ന്യൂഡല്ഹി: ലോകചാമ്പ്യന്ഷിപ്പില് വെങ്കലമെടലുകൊണ്ട് തൃപ്തിപ്പെടേണ്ടി വന്നതില് സന്തോഷവും അതേസമയം സങ്കടവുമുണ്ടെന്ന് ഇന്ത്യന് ഗുസ്തിതാരം ബജരംഗ് പൂനിയ. എന്നാല് മത്സരഫലത്തിലെ വിധിനിര്ണ്ണയത്തില് റഫറിയുടെ തീരുമാനത്തെ അംഗീകരിക്കുന്നതായി ഇന്ത്യന് സൂപ്പര് താരം പറഞ്ഞു.
‘വെങ്കലം കിട്ടിയതില് ഞാന് സന്തുഷ്ടനാണ്. എന്നാല് അതേസമയം സ്വര്ണ്ണം നേടാനാകാത്തതില് വിഷമവുമുണ്ട്. എന്നില് നിന്ന് ജനങ്ങളേറെ പ്രതീക്ഷിച്ചിരുന്നു. എന്തൊക്കെയായാലും റഫറിയുടെ തീരുമാനം മാറ്റാനാകില്ല. ഇനി ശ്രദ്ധ പരിശീലനത്തില് മാത്രം’ പൂനിയ പറഞ്ഞു.
നേരത്തെ, ലോക ഒന്നാം നമ്പറായ പൂനിയ 65 കിലോ വിഭാഗത്തിലാണ് ലോക ചാമ്പ്യന്ഷിപ്പില് സെമിയില് കടന്നത്. മത്സരത്തില് ദോലത് നിയാസ്ബെക്കോവിനോട് 9-9ന് തുല്യതപാലിച്ച് പിടിമുറുക്കി നില്ക്കുമ്പഴാണ് റഫറി കളി നിര്ത്തിയത്. കളിയുടെ ഫലം പുന: പരിശോധിക്കണമെന്ന ആവശ്യവുമായി ഇന്ത്യന് റെസലിംഗ് ഫെഡറേഷന്, ലോക റെസലിംഗ് ഫെഡറേഷനില് പരാതി നല്കിയിരുന്നു. പൂനിയക്ക് മെഡല് നഷ്ടമായതിനെ വിമര്ശിച്ച് 2012ലെ ഒളിമ്പിക് വെങ്കല മെഡല് ജേതാവ് യോഗേശ്വര് ദത്തും രംഗത്ത് വന്നിരുന്നു.
