ദോഹ: 2022ല് ഖത്തറില് നടക്കുന്ന ലോകകപ്പ് മത്സരം കാണാന് ആര്ക്കും തടസ്സമില്ലെന്ന് ഖത്തര്. കളി കാണാനെത്തുന്നവര് രാജ്യത്തിന്റെ സംസ്കാരത്തെയും പൈതൃകത്തെയും ബഹുമാനിക്കണം. ട്രാന്സ്ജെന്ഡറുകള്ക്കും സ്വവര്ഗാനുരാഗികള്ക്കും മത്സരം കാണാന് യാതൊരു വിലക്കുമില്ലെന്നും അധികൃതര് വ്യക്തമാക്കി.
ഖത്തറിലെ നിലവിലെ നിയമമനുസരിച്ച് സ്വവര്ഗാനുരാഗം നിയമവിരുദ്ധമാണ്. എന്നിരുന്നാലും ലോകകപ്പ് മത്സരം കാണുന്നതിന് ഏതു ജനവിഭാഗത്തിനും കടന്നു വരാമെന്ന് ഖത്തര് ലോകകപ്പിന്റെ ചുമതലയുള്ള ചീഫ് എക്സിക്യൂട്ടീവ് നാസര് അല് ഖാത്തര് പറഞ്ഞു. ലോകത്തെ ഏറ്റവും സുരക്ഷിത രാജ്യമായ ഖത്തറില് ലിംഗം, ലൈംഗിക ആഭിമുഖ്യം, മതം, വംശം തുടങ്ങിയ ഘടകങ്ങള് മത്സരം കാണുന്നതിന് തടസ്സമല്ലെന്നും അദ്ദേഹം കൂട്ടിച്ചേര്ത്തു.
കളി കാണാന് എത്തുന്ന സന്ദര്ശകര്ക്ക് പൂര്ണ സുരക്ഷ നല്കും. പത്തു ലക്ഷത്തിലധികം ആളുകളെയാണ് ലോകകപ്പ് സമയത്ത് ഖത്തറില് പ്രതീക്ഷിക്കുന്നത്. അവര്ക്കായുള്ള സൗകര്യങ്ങള് തയ്യാറാക്കിക്കൊണ്ടിരിക്കുകയാണെന്നും അദ്ദേഹം പറഞ്ഞു. മത്സരം കാണാന് എത്തുന്ന ട്രാന്സ്ജെന്ഡര് വിഭാഗക്കാര്ക്ക് സ്റ്റേഡിയത്തില് പ്രത്യേകം ഇരിപ്പടമൊരുക്കാന് തീരുമാനമായിട്ടുണ്ടെന്നും നാസര് പറഞ്ഞു.
ഖത്തറിന്റെ നിയമത്തില് പൊതു ഇടങ്ങളില് മദ്യപിക്കുന്നതിന് വിലക്കുണ്ടെങ്കിലും അതിഥികള്ക്കായി പരമ്പരാഗത മദ്യശാലകള്ക്കു പുറമേ കൂടുതല് പുതിയ മദ്യശാലകളും തുറക്കുമെന്ന് അധികൃതര് വ്യക്തമാക്കി. സാമാധാനപരമായ അന്തരീക്ഷത്തില് മത്സരം ആഘോഷമാക്കാനാണ് ഖത്തര് ഒരുങ്ങുന്നത്.
