ന്യൂഡല്ഹി: ഇന്ത്യയുടെ 100-ാമത് ഗ്രാന്ഡ്മാസ്റ്ററിലേക്കുള്ള യാത്രയില് മറ്റൊരു സുപ്രധാന നേട്ടം കൂടി. തമിഴ്നാട്ടിലെ കന്യാകുമാരി സ്വദേശിയായ 17-കാരന് അശ്വത് എസ് ഇന്ത്യയുടെ 98-ാമത് ചെസ് ഗ്രാന്ഡ്മാസ്റ്റര് എന്ന ചരിത്രനേട്ടം സ്വന്തമാക്കി. 2026 പൂനെ ഇന്റര്നാഷണല് ഗ്രാന്ഡ്മാസ്റ്റര് റൗണ്ട് റോബിന് ടൂര്ണമെന്റിലാണ് അശ്വത് തന്റെ മൂന്നാമത്തെയും അവസാനത്തെയും ഗ്രാന്ഡ്മാസ്റ്റര് നേട്ടം പൂര്ത്തിയാക്കിയത്.
അവസാന റൗണ്ടില് ജയിച്ചാല് മാത്രമേ ഗ്രാന്ഡ്മാസ്റ്റര് പദവി ഉറപ്പിക്കാനാകുമായിരുന്നുള്ളൂ. നിര്ണായക മത്സരത്തില് കറുത്ത കരുക്കളുമായി കളിച്ച അശ്വത്, അമേരിക്കയുടെ എഫ്.എം. കണ്ണന് വൈദ്യനാഥനെ തോല്പ്പിച്ചാണ് സ്വപ്നനേട്ടം സ്വന്തമാക്കിയത്. ഒമ്പത് റൗണ്ടുകളില് നിന്ന് ആറ് ജയം, രണ്ട് സമനില, ഒരു തോല്വി ഉള്പ്പെടെ ഏഴ് പോയിന്റ് നേടിയ അശ്വത് ടൂര്ണമെന്റില് രണ്ടാം സ്ഥാനവും കരസ്ഥമാക്കി.
കഴിഞ്ഞ വര്ഷം നടന്ന ഗ്രെങ്കെ ഓപ്പണില് ആദ്യ ഗ്രാന്ഡ്മാസ്റ്റര് നോര്ം നേടിയ അശ്വത്, ഡിസംബറില് ബുഡാപെസ്റ്റില് നടന്ന ഫസ്റ്റ് സാറ്റര്ഡേ ജിഎം റൗണ്ട് റോബിന് ടൂര്ണമെന്റില് രണ്ടാം നോര്ം നേടുകയും 2500 റേറ്റിംഗ് കടക്കുകയും ചെയ്തിരുന്നു. പൂനെ ടൂര്ണമെന്റിന്റെ തുടക്കത്തില് ഗ്രാന്ഡ്മാസ്റ്റര് അഭിജീത് ഗുപ്തയോട് തോറ്റെങ്കിലും പിന്നീട് മികച്ച തിരിച്ചുവരവ് നടത്തിയ അശ്വത് തുടര്ച്ചയായ വിജയങ്ങളിലൂടെ കരിയറിലെ ഏറ്റവും വലിയ നേട്ടത്തിലെത്തി.
അശ്വത്തിന്റെ നേട്ടത്തോടെ ലോക ചെസില് ഇന്ത്യയുടെ കുതിപ്പ് കൂടുതല് ശക്തമായി. രാജ്യത്തിന്റെ 100-ാമത് ഗ്രാന്ഡ്മാസ്റ്റര് എന്ന ചരിത്രനേട്ടത്തിലേക്ക് ഇന്ത്യ ഇനി വെറും രണ്ട് ചുവടുകള് മാത്രം അകലെയാണ്.
