ന്യൂഡല്ഹി: ഇന്ത്യയുടെ അതിര്ത്തിയിലെ ആകാശസുരക്ഷ ശക്തമാക്കാന് വിമാനവേധ മിസൈലായ ആകാശിനെ വിന്യസിക്കാന് സൈന്യം ഒരുങ്ങുന്നതായി സൂചന. ഹിമാലയന് മലനിരകള് കടന്ന് പെട്ടന്നുള്ള പാക്-ചൈനാ വ്യോമാക്രമണം തടയാനായിട്ടാണ് സൈന്യം ആകാശിന്റെ വിന്യാസത്തിലൂടെ ഉദ്ദേശിക്കുന്നത്.മിസൈല് കൈവശം കിട്ടാനായി പ്രതിരോധവകുപ്പിന്റെ അനുമതിക്കായി കരസേന അനുവാദം ചോദിച്ചിരിക്കുകയാണെന്ന് പ്രതിരോധ വൃത്തങ്ങള് സൂചിപ്പിച്ചു.
15000 അടി ഉയരത്തില് വരെ പ്രഹരശേഷിയുള്ള ആകാശ് മിസൈലുകള് കൃത്യതയുടെയും വേഗതയുടേയും കാര്യത്തില് ഏറെ പേരുകേട്ട മിസൈല് വിഭാഗമാണ്.ലഡാക്ക് കേന്ദ്രീകരിച്ച് ഏറ്റവും ഉയരത്തില് വിന്യസിക്കാനാണ് സൈന്യം പദ്ധതി തയ്യാറാക്കി പ്രതിരോധ മന്ത്രാലയത്തിന് സമര്പ്പിച്ചിരിക്കുന്നത്.
10,000 കോടി ചിലവുവരുന്ന ആകാശ് വിഭാഗത്തിലുള്ള മിസൈലുകള്ക്ക് നിലവിലുള്ള പ്രഹരശേഷി കൂട്ടാനും സാധിക്കുമെന്നതും മറ്റൊരു ഗുണമായി സൈന്യം വ്യക്തമാക്കുന്നു.സൈന്യത്തിനായി ഡിആര്ഡിഒയാണ് ആകാശ് മിസൈല് രൂപകല്പന ചെയ്തത്.പ്രതിരോധ മന്ത്രി രാജ്നാഥ് സിംഗും കരസേനാ മേധാവി ബിപിന് റാവത്തും അടങ്ങുന്ന സമിതിയാണ് തീരുമാനിക്കുക. നിലവില് ആകാശ് മിസൈലുകളുടെ രണ്ടു റെജിമെന്റുകളാണ് സൈന്യത്തിലുള്ളത്. ഇതു കൂടാതെ രണ്ട് അധിക യൂണിറ്റുകള് ലഡാക്ക കേന്ദ്രീകരിച്ച് വേണമെന്ന ആവശ്യമാണ് പരിഗണനക്കുള്ളത്. ഈ വര്ഷമാദ്യം മെയ് 25നും 27നുമാണ് ആകാശ് മിസൈല് സൈന്യത്തിന്റെ ആവശ്യത്തിനായി പരീക്ഷിച്ചത്.