ന്യൂഡല്ഹി: അന്തരീക്ഷ മലിനീകരണം അതീവ അപകടാവസ്ഥയില് നില്ക്കെ ഇന്ത്യാ- ബംഗ്ലാദേശ് അന്താരാഷ്ട്ര ടി20 ക്രിക്കറ്റ് മത്സരം നടത്താനൊരുങ്ങി ബിസിസിഐ. എന്നാല് കളിക്കുന്ന 22 താരങ്ങള്ക്കൊപ്പം സ്റ്റേഡിയത്തില് കളികാണാനെത്തുന്ന അരലക്ഷം പേരുടെ ആരോഗ്യത്തെ ഹാനീകരമായി ബാധിക്കുമെന്ന മുന്നറിയിപ്പുമായി മുന് താരങ്ങള് രംഗത്തെത്തി.
അനുവദനീയമായ വായു മലിനീകരണത്തോതിനേക്കാള് പതിന്മടങ്ങ് വര്ധനയാണ് മലിനീകരണമാപിനി കാണിക്കുന്നതെന്ന് മുന്താരം മദന്ലാല് പറഞ്ഞു. ‘ജനങ്ങള് സാധാരണനിലയില്ത്തന്നെ പുറത്തിറങ്ങുന്നത് കുറഞ്ഞുവരുന്നു. ഇത്തരം സാഹചര്യത്തില് ഒരു സ്ഥലത്ത് തന്നെ ഇത്രയധികം ആളുകള് ഒന്നിച്ചുവരുന്നത് ശ്രദ്ധിക്കേണ്ട വിഷയമാണ്.
മലിനീകരണമൂലം കട്ടികൂടിയ വായു ശ്വസിക്കുന്നത് 22 താരങ്ങളെ ഗുരുതരമായ രോഗങ്ങളിലേയ്ക്ക് തള്ളിവിടും. കാണികള്ക്കും അന്തരീക്ഷം പ്രശ്നമാകും. വായു മലിനീകരണം വെള്ളത്തേയും മലീമസമാക്കും എന്നത് ആരും ശ്രദ്ധിക്കുന്നില്ല. സര്ക്കാര് അടിയന്തിര നടപടികളെടുക്കണം’ ഇന്ത്യയുടെ ആദ്യ ലോകകപ്പ് നേട്ടത്തില് പങ്കുവഹിച്ച ഓള്റൗണ്ടര് മദന്ലാല് പറഞ്ഞു.
ഇതിനിടെ നടക്കാനിരിക്കുന്ന പകല് രാത്രി ടെസ്റ്റ് മത്സരങ്ങള് ക്രിക്കറ്റിനെ ഏറെ ആരാധിക്കുന്ന ഇന്ത്യന് കാണികളെ കളികാണാന് പ്രേരിപ്പിക്കുമെന്നും മദന്ലാല് പ്രത്യാശപ്രകടിപ്പിച്ചു.
