ചണ്ഡീഗഢ്: ഇന്ത്യക്കെതിരെ ഭീകരന്മാരെ പരിശീലിപ്പിക്കുന്ന നിരവധി കേന്ദ്രങ്ങള് കേന്ദ്രീകരിച്ചിരിക്കുന്നത് പാകിസ്ഥാനിലെ പഞ്ചാബ് പ്രവിശ്യയിലെ നാരോവാള് ഗ്രാമത്തിലാണെന്ന് രഹസ്യാന്വേഷണ വിഭാഗം കണ്ടെത്തി. നിലവില് പ്രസിദ്ധമായ കര്താര്പൂര് സാഹിബ് ഗുരുദ്വാര നിലനില്ക്കുന്ന പ്രദേശമാണ് നാരോവാളെന്നത് അതീവ ഗൗരവമേറിയ വിഷയമാണെന്നും രഹസ്യാന്വേഷണ വിഭാഗം അറിയിച്ചു. ഖാലിസ്ഥാന് ഭീകരന്മാര് കേന്ദ്രീകരിച്ചേക്കാമെന്നും രഹസ്യാന്വേഷണ വിഭാഗം സംശയിക്കുന്നു. ഏതു അടിയന്തിര സാഹചര്യവും നേരിടാനായി സുരക്ഷാ വിഭാഗം യോഗം ചേര്ന്നു.
പാകിസ്ഥാനിലെ ഭീകരപരിശീലനങ്ങളെപ്പറ്റി നിരന്തരം മുന്നറിയിപ്പുകള് അന്താരാഷ്ട്ര വേദികളില് ഉന്നയിക്കുന്ന ഇന്ത്യയുടെ നിലപാടുകള് ശരിവയ്ക്കുന്നതാണ് കര്താര്പൂരിലെ ഭീകരകേന്ദ്രങ്ങളെ സംബന്ധിച്ചുള്ള സൂചനയെന്നും പഞ്ചാബ് അതിര്ത്തിയില് നിന്ന് സൈനിക വൃത്തങ്ങള് അറിയിച്ചു. പഞ്ചാബ് പ്രവിശ്യയിലെ മുര്ദികെ, ഷക്കാര്ഗഢ്, നരോവാള് എന്നിവിടങ്ങള് കേന്ദ്രീകരിച്ചാണ് പാക്ഭീകരരുടെ സജീവ കേന്ദ്രങ്ങള് നിലവിലുള്ളത്. പഞ്ചാബ് മേഖലയിലെ സുരക്ഷാവിഭാഗങ്ങളുടെ സംയുക്തയോഗത്തിലാണ് രഹസ്യാന്വേഷണ വിഭാഗത്തിന്റെ വിവരങ്ങള് ചര്ച്ചചെയ്തത്. നിലവില് തീര്ത്ഥാടകര് കര്താര്പൂരിലാണുള്ളത്. വരുന്ന 12-ാം തിയതി ഗുരുനാനാക് 550-ാം ജന്മവാര്ഷിക ആഘോഷം നടക്കാനിരിക്കുകയാണ്. തീര്ത്ഥാടകരെ ഭീകരര് തട്ടിക്കൊണ്ടുപോയി വിലപേശാനുള്ള സാധ്യതയും സുരക്ഷാ വിഭാഗം അതിനാല് തള്ളിക്കളയുന്നില്ല.
മുന്പേ തന്നെ കര്താര്പൂര് തീര്ത്ഥാടനത്തിന് പാകിസ്ഥാന് വളരെ ആവേശത്തോടെ തയ്യാറെടുപ്പുകള് നടത്തിയത് സുരക്ഷാ വിഭാഗം സംശയത്തോടെയാണ് നിരീക്ഷി്ക്കുന്നത്. ഖാലിസ്ഥാന് ഭീകരര് സിഖ് തീര്ത്ഥാടകരെ ബന്ദിയാക്കാനുള്ള സാധ്യതകളാണ് രഹസ്യാന്വേഷണ വിഭാഗം കേന്ദ്ര ആഭ്യന്തര വിഭാഗത്തെ അറിയിച്ചത്.
പ്രസിദ്ധമായ കര്താര്പൂര്, സിഖ്മത സ്ഥാപകന് ഗുരുനാനാക് ദേവിന്റെ സമാധി സ്ഥലമാണ്. വിവിധ ഘട്ടങ്ങളിലായി പതിനായിരത്തിലധികം സിഖ് വംശജര് ഗുരുദ്വാരയിലേക്ക് തീര്ത്ഥാടനത്തിനെത്തിക്കൊണ്ടിരിക്കുകയാണ്. ഇന്ത്യയിലെ പഞ്ചാബിലെ ദേരാ ബാബാ നാനക് സാഹിബ് ഗുരുദ്വാര മുതല് പാകിസ്ഥാനിലെ കര്താര്പൂര് സാഹിബ് ഗുരുദ്വാര വരെയുള്ള ഭാഗം തീര്ത്ഥാടന ഇടനാഴി എന്ന നിലയിലാണ് അറിയപ്പെടുന്നത്. തീര്ത്ഥാടകരെ ഇരുരാജ്യത്തെ സൈന്യവും കനത്ത സുരക്ഷാ പരിശോധനകള്ക്ക് ശേഷമാണ് കടത്തിവിട്ടുകൊണ്ടിരിക്കുന്നത്.
