കസാഖിസ്ഥാന്‍: പാക്കിസ്ഥാനെതിരെ ഡേവിസ് കപ്പില്‍ ഇന്ത്യ 3-0ന്റെ ആധികാരിക ജയം നേടി. ഡബിള്‍സില്‍ ലിയാന്റര്‍ പെയ്‌സും ജീവന്‍ നെടുംചെഴിനും ചേര്‍ന്ന സഖ്യമാണ് പാക് ജോഡികളെ തോല്‍പ്പിച്ചത്. 6-1, 6-3 നാണ്് ഇന്ത്യന്‍ സഖ്യം പാകിസ്ഥാനെ അനായാസം കീഴടക്കിയത്. പാകിസ്ഥാന് വേണ്ടി മുഹമ്മദ് ഷോഐബും ഹുഫൈസാ അബ്ദുള്‍ റെഹ്മാനുമാണ് കളിക്കാനിറങ്ങിയത്.
ഏറെ പ്രത്യേകതകള്‍ നിറഞ്ഞ മത്സരമാണ് ഡബിള്‍സില്‍ നടന്നത്. ഇന്ത്യന്‍ നിരയില്‍ 18 ഗ്രാന്‍സ്ലാം ഡബിള്‍സ് കിരീടം നേടിയ പെയ്‌സ് കളിച്ചത് ആദ്യമായി ഡേവിസ് കപ്പില്‍ അരങ്ങേറ്റം കുറിച്ച ജൂനിയര്‍ താരം ജീവന്‍ നെടുംചെഴിയനുമൊത്താണ്. പെയ്‌സിന്റെ ഡേവിസ്‌കപ്പ് ചരിത്രത്തിലെ 44-ാം ഡബിള്‍സ് വിജയമാണ് ഇന്ന് നേടിയത്.
ആകെ 5 കളികളുള്ള ഡേവിസ്‌കപ്പ് ഏഷ്യന്‍ മേഖലാ യോഗ്യതാ മത്സരത്തില്‍ ഇനി ബാക്കിയുള്ള റിവേഴ്‌സ് സിംഗിള്‍സുകള്‍ ഇന്ന് രാത്രി നടക്കും. സുമിത് നാഗല്‍ മുഹമ്മദ് ഷോഐബിനേയും രാകുമാര്‍ രാംനാഥന്‍ ഹുഫൈസാ അബ്ദുളിനേയുമാണ് നേരിടുക. ഇന്ത്യന്‍ താരങ്ങള്‍ രണ്ടുപേരും ഇന്നലെ ആദ്യ സിംഗിള്‍സ് പോരാട്ടങ്ങളില്‍ ജയിച്ച് 2-0ന്റെ ലീഡ് ഇന്ത്യക്ക് സമ്മാനിച്ചിരുന്നു.
