തിരുവനന്തപുരം: ഇന്ത്യാ വെസ്റ്റിന്‍ഡീസ് പര്യടനത്തിലെ രണ്ടാം ടി20 മത്സരത്തില്‍ കാര്യമായി റണ്ണൊഴുകുമെന്ന് ഉറപ്പുനല്‍കുകയാണ് ക്യൂറേറ്റര്‍. കാര്യവട്ടം സ്‌പോര്‍ട്ട് ഹബ്ബിലെ പിച്ചിനെ മികച്ചരീതിയിലാണ് തയ്യാറാക്കിയിരിക്കുന്നതെന്നു പറഞ്ഞ ക്യൂറേറ്റര്‍ മഴയെ നേരിടാന്‍ വേണ്ട സജ്ജീകരണങ്ങളും ഒരുക്കിക്കഴിഞ്ഞെന്നും പറഞ്ഞു.
തിരുവനന്തപുരത്തെ മത്സരം 8-ാം തീയതി ഞായറാഴ്ചയാണ് നടക്കാനിരിക്കുന്നത്. ആദ്യ ടി20 വെള്ളിയാഴ്ച ഹൈദരാബാദിലാണ് നടക്കുക. മൂന്നാം ടി20 11-ാം തീയതി മുംബൈയിലും നടക്കും. തുടര്‍ന്ന് മൂന്ന് ഏകദിനങ്ങള്‍ 15ന് ചെന്നൈയിലും 18ന് വിശാഖപട്ടണത്തിലും 22ന് കൊല്‍ക്കത്തയിലും അരങ്ങേറും.
ഇന്ത്യക്കായി ഏറെ കാത്തിരിപ്പിനൊടുവില്‍ സഞ്ജു വി സാംസണ്‍ ടീമിലെത്തിയത് കേരള ക്രിക്കറ്റിന് പ്രതീക്ഷ നല്‍കുന്നതായി ക്രിക്കറ്റ് അസോസിയേഷന്‍ പ്രതിനിധികള്‍ പറഞ്ഞു. സ്വന്തം മണ്ണില്‍ കളിക്കാനായാല്‍ അതിലും വലിയ സന്തോഷമില്ലെന്ന് സഞ്ജുവും കഴിഞ്ഞ ദിവസം വ്യക്തമാക്കിയിരുന്നു.
അന്താരാഷ്‌ട്ര മത്സരത്തിനായുളള ടിക്കറ്റ് വില്‍പ്പനയും ആവേശത്തോടെയാണെന്ന് പ്രസിഡന്റ് ജയേഷ് ജോര്‍ജ്ജ് സൂചിപ്പിച്ചു. നിലവില്‍ 32000 ടിക്കറ്റുകളില്‍ 80 ശതമാനവും വിറ്റുപോയി. ഇനി ബാക്കിയുള്ളത് 4000 ടിക്കറ്റുകള്‍ മാത്രമാണെന്നും അദ്ദേഹം പറഞ്ഞു.
