ജമൈക്ക: ബ്രയാന്‍ലാറ അന്താരാഷ്‌ട്രക്രിക്കറ്റിലെ ടെസ്റ്റ് മത്സര അരങ്ങേറ്റം നടത്തിയ ദിവസമാണിന്ന്. ക്രിക്കറ്റിലെ കറുത്ത മുത്തായി അറിയപ്പെട്ട, ടെസ്റ്റില്‍ നാനൂറെന്ന മാന്ത്രിക സംഖ്യയുടെ റെക്കോഡുകാരനായ വെസ്റ്റിന്‍ഡീസിന്റെ എക്കാലത്തേയും മികച്ച ബാറ്റ്‌സ്മാനാണ് ബ്രയാന്‍ ലാറ. അരങ്ങേറ്റ ദിനത്തില്‍ ലാറയ്ക്ക് ഐസിസി സമൂഹമാധ്യമങ്ങളിലൂടെ ആശംസ നേര്‍ന്നു.
1990 ഡിസംബര്‍ 6 നായിരുന്നു ടെസ്റ്റ് അരങ്ങേറ്റം.ആദ്യ എതിരാളികള്‍ പാകിസ്ഥാനായിരുന്നു. അതേ പരമ്പരയില്‍ത്തന്നെയാണ് ഏകദിനത്തിലും അരങ്ങേറിയത്. അവസാന ടെസ്റ്റും 2006ല്‍ പാകിസ്ഥാനെതിരെയായിരുന്നു.
കരീബിയന്‍ നിരയില്‍ വിവിയന്‍ റിച്ചാഡ്‌സിന് ശേഷം ലോകബാറ്റിംഗ് താരാപഥത്തിലേക്ക് ഉയര്‍ന്ന പ്രതിഭ. ബ്രയാന്‍ ലാറയെന്ന ഇടംകയ്യന്‍, അത്ഭുതമായി മാറിയത് പെട്ടന്നായിരുന്നു. അതിവേഗം പന്തുകളെ ബൗണ്ടറികടത്തുന്ന റിസ്റ്റ് ഷോട്ടുകളും കവര്‍ ഡ്രൈവുകളുമായി ലാറ ആവേശമായി. ആദ്യ ടെസ്റ്റില്‍ വെറും 6 റണ്‍സ് അകലെ അര്‍ദ്ധസെഞ്ച്വറി നഷ്ടമായെങ്കിലും കളിക്കളത്തിലെ മിസ്റ്റര്‍ കൂള്‍ 12000 ടെസ്റ്റ് റണ്‍സുകളാണ് സ്വന്തംപേരില്‍ ചേര്‍ത്തത്.
ലോകക്രിക്കറ്റില്‍ ഒരു ടീം കഷ്ടപ്പെട്ട് അടിച്ചുകൂട്ടുന്ന റണ്‍സ് അത്രയും ഒറ്റക്ക് അടിക്കുന്ന റണ്‍മെഷീനായാണ് ലാറ പിന്നീട് മാറിയത്. ഫസ്റ്റ്ക്ലാസ്സ് ക്രിക്കറ്റില്‍ വാര്‍വിക്ക്‌ഷെറിനായി 1994ല്‍ നേടിയ 501 റണ്‍സ് ഇന്നും പിന്‍ഗാമികള്‍ക്ക് മുന്നില്‍ വന്‍മലയായി നിലനില്‍ക്കുന്നു. വെറും 474 മിനിറ്റില്‍ 427 പന്തുകളിലാണ് 501 റണ്‍സ് നേടിയത്. 2004ല്‍ ഇംഗ്ലണ്ടിനെ അമ്പരപ്പിച്ചുകൊണ്ട് നേടിയത് 400 നോട്ടൗട്ട് ആയിരുന്നു.ലാറ നേടിയ ഏറ്റവും വലിയ അന്താരാഷ്‌ട്ര സക്കോറും ഇതുതന്നെ. ആദ്യ ടെസ്റ്റ് സെഞ്ച്വറി നേടിയത് കളിച്ച അഞ്ചാമത്തെ ടെസ്റ്റിലായിരുന്നു.1993ല്‍ ഓസ്‌ട്രേലിയക്കെതിരെയായിരുന്നു കന്നി സെഞ്ച്വറി. 34 സെഞ്ച്വറികളും 48 അര്‍ദ്ധസെഞ്ച്വറികളും ലാറയുടെ നേട്ടത്തിന്റെ ഭാഗമായി.
