കൊച്ചി: മുടങ്ങി കിടക്കുന്ന സിനിമകള് പൂര്ത്തിയാക്കുമെന്ന് അമ്മയ്ക്ക് ഉറപ്പ് നല്കി ഷെയ്ന് നിഗം. നടന് സിദ്ധീഖിന്റെ മധ്യസ്ഥതയിലാണ് കഴിഞ്ഞ ദിവസം രാത്രി ചര്ച്ച നടന്നത്. സിദ്ധീഖിന്റെ വീട്ടില്വെച്ചു നടന്ന ചര്ച്ചയിലാണ് ഷെയ്ന് നിഗം അമ്മ ജനറല് സെക്രട്ടറി ഇടവേള ബാബുവിന് ഇത് സംബന്ധിച്ച് ഉറപ്പ് നല്കിയത്.
മുടങ്ങിക്കിടക്കുന്ന സിനിമകള് പൂര്ത്തിയാക്കാന് തയ്യാറാണെന്ന് ഷെയ്ന് നിഗം പറഞ്ഞു. വിഷയവുമായി ബന്ധപ്പെട്ട് തനിക്ക് പറയാനുള്ളതെല്ലാം ഷെയ്ന് അമ്മയുടെ സെക്രട്ടറിയോട് വിശദികരിച്ചു. അതേസമയം, ഷെയ്ന് പറഞ്ഞ ചില കാര്യങ്ങളില് അവ്യക്തതയുള്ളതിനാല് ഫെഫ്ക നേതൃത്വവുമായി അമ്മ ഭാരവാഹികള് രണ്ടു ദിവസത്തിനകം ചര്ച്ച നടത്തും. വെയില് സിനിമയ്ക്ക് ഇനി എത്ര ദിവസം കൂടിയാണ് വേണ്ടതെന്ന കാര്യത്തിലാണ് ഇനി വ്യക്തത ലഭിക്കാനുള്ളത്.
നേരത്തെ നടന്ന ഒത്തു തീര്പ്പ് ചര്ച്ചയില് 15 ദിവസമാണ് സംവിധായകന് ആവശ്യപ്പെട്ടത്. എന്നാല് സെറ്റിലെത്തിയപ്പോള് 24 ദിവസത്തെ ഷൂട്ട് വേണമെന്ന് സംവിധായകന് പറഞ്ഞതോടെയാണ് ഇവര്ക്കിടയില് വീണ്ടും പ്രശ്നങ്ങള് തുടങ്ങിയത്.
എന്നാല് സംവിധായകന് പറഞ്ഞ സമയത്ത് സിനിമ തീര്ക്കാന് സാധ്യമാകില്ലെന്നുമാണ് ഷെയ്നിന്റെ നിലപാട്. ഇക്കാര്യത്തില് ഫെഫ്ക നേതൃത്വം സംവിധായകനുമായി ആശയവിനിമയം നടത്തിയ ശേഷം അമ്മ ജനറല് സെക്രട്ടറിയെ കാര്യങ്ങള് ധരിപ്പിക്കും. ഇക്കാര്യങ്ങളില് വ്യക്തത വന്ന ശേഷമാകും നിര്മാതാക്കളുടെ സംഘടനയുമായി ചര്ച്ച നടത്തുക.
ഷെയ്ന് നിഗവും സംവിധായകനും നിര്മാതാവും ഒന്നിച്ചിരുന്നുള്ള ചര്ച്ച ആവശ്യമില്ലെന്ന് അമ്മ നേതൃത്വം അറിയിച്ചു. വിവിധ സംഘടനകളുടെ നേതൃത്വമായിരിക്കും ഇക്കാര്യത്തില് പരസ്പരം ചര്ച്ച നടത്തുക. അമ്മ എടുക്കുന്ന ഏതേ തീരുമാനവും അംഗീകരിക്കാന് സന്നദ്ധതനാണെന്ന് ഷെയ്ന് നിഗം അറിയിച്ചിട്ടുണ്ട്.