മാഡ്രിഡ് : ചാമ്പ്യന്‍സ് ലീഗിലെ 6-ാം കളിയില്‍ ചെല്‍സിക്കും ബാഴ്‌സക്കും ജയം. ഇന്ന് പുലര്‍ച്ചെ നടന്ന 6 കളികളില്‍ ഡോട്ട്മുണ്ട്, ബെന്‍ഫികാ വലന്‍സിയ എന്നിവരും ജയം കണ്ടപ്പോള്‍ ലയണ്‍ സമനില കൊണ്ട് തൃപ്തിപ്പെട്ടു.
ലെലെക്കെതിരെ 2-1ന്റെ ജയമാണ് ചെല്‍സി നേടിയത്. ആദ്യ പകുതിയില്‍ താമി അബ്രഹാമും സീസര്‍ ആപ്ലികൂറ്റേയും നേടിയ ഗോളിലാണ് നീലപ്പട മുന്നിലെത്തിയത്. രണ്ടാം പകുതിയുടെ 78-ാം മിനിറ്റില്‍ ലെലേക്ക് വേണ്ടി ലോക് റെമി ഏക ഗോള്‍ നേടി. ശക്തരായ ബാഴ്‌സലോണ ഇന്റര്‍ മിലാന്‍ പോരാട്ടത്തില്‍ 2-1ന് ബാഴ്‌സ ഇന്ററിനെതിരെ ആവേശകരമായ ജയം നേടി.
മെസ്സിയില്ലാതെ ഇറങ്ങിയ കളിയില്‍ 23-ാം മിനിറ്റില്‍ കാര്‍ലസ് പെരസ് ആദ്യ ഗോള്‍ നേടി. ബാഴ്‌സയുടെ ജൂനിയര്‍ താരം ആന്‍സൂ ഫാത്തി രണ്ടാം ഗോളിലൂടെ ശ്രദ്ധനേടി. കളിയുടെ ആദ്യപകുതിയില്‍ ഇന്റര്‍ മിലാനു വേണ്ടി 44-ാം മിനിറ്റില്‍ സമനില ഗോള്‍ നേടിയിരുന്നു. എന്നാല്‍ കളിയുടെ 86-ാം മിനിറ്റിലായിരുന്നു ഫാത്തിയുടെ വിജയ ഗോള്‍ പിറന്നത്.
വലന്‍സിയുടെ മത്സരം അജാക്‌സിനെതിരെയായിരുന്നു. ഏകപക്ഷീയമായ ഒരു ഗോളിനാണ് വലന്‍സിയ ജയിച്ചത്. 24-ാം മിനിറ്റില്‍ റോഡ്രീഗോയാണ് ഗോള്‍ നേടിയത്.
