ലണ്ടന്: മാഞ്ചസ്റ്റര് യുണൈറ്റഡിന് യൂറോപ്പാ ലീഗില് തകര്പ്പന് ജയം. അല്ക്കമാറിനെ എതിരില്ലാത്ത നാലു ഗോളുകള്ക്കാണ് യുണൈറ്റഡ് തകര്ത്തുവിട്ടത്. രണ്ടാം പകുതിയില് വെറും 11 മിനിറ്റുകള്ക്കിടയിലാണ് യുണൈറ്റഡ് 4 ഗോളുകളും അടിച്ചത്. മാസണ് ഗ്രീന്വുഡിന്റെ ഇരട്ട ഗോളുകളുടെ മികവിലാണ് എതിരാളികളെ തറപറ്റിച്ചത്.
ആദ്യ ഗോള് 53-ാം മിനിറ്റില് അഷ്ലി യങ്ങിന്റെ വകയായിരുന്നു. തുടര്ന്ന് 58-ാം മിനിറ്റില് ഗ്രീന്വുഡിന്റെ വക രണ്ടാം ഗോളും പിറന്നു. 62-ാം മിനിറ്റില് പെനാല്റ്റിയിലൂടെ ജുവാന് മാറ്റ മൂന്നാം ഗോളും 64-ാം മിനിറ്റില് ഗ്രീന്വുഡ് തന്റെ രണ്ടാം ഗോളിലൂടെ ടീമിന് വേണ്ടി നാലാമതും വല ചലിപ്പിച്ചു. ജയത്തോടെ ഗ്രൂപ്പ് എല്ലില് യുണൈറ്റഡ് ഒന്നാമതായി നിലയുറപ്പിച്ചിരിക്കുകയാണ്.
ഇന്നലെ നടന്ന മറ്റൊരു മത്സരത്തില് അഴ്സണലും സ്റ്റാന്ഡേര്ഡ് ലീജേയും സമനിലയില് പിരിഞ്ഞു. രണ്ടു ഗോളിന് പിന്നില് നിന്ന ശേഷമാണ് മികച്ച തിരിച്ചുവരവോടെ ആഴ്സണല് സമനില പിടിച്ചത്. രണ്ടാം പകുതിയുടെ തുടക്കത്തില്ത്തന്നെ 47-ാം മിനിറ്റിലും 69-ാം മിനിറ്റിലുമാണ് സ്റ്റാന്ഡേര്ഡ് രണ്ടു ഗോളുകളുടെ ലീഡ് നേടിയത്. എന്നാല് 78-ാം മിനിറ്റില് അലക്സാണ്ടര് ലക്കാഷേയും ബുക്കായോ സാകാ 81-ാം മിനിറ്റിലും ഗോള് നേടി സമനില പിടിച്ചു.ഗ്രൂപ്പ് ഏഫില് ആഴ്സണല് ഒന്നാമതായി നില്ക്കുകയാണ്.
