ആന്‍ഡ്രോയിഡ് സ്മാര്‍ട്ട് ഫോണ്‍ ഉപയോക്താക്കള്‍ക്ക് സുരക്ഷാ മുന്നറിയിപ്പുമായി കേന്ദ്ര ആഭ്യന്തര മന്ത്രാലയം. ബാങ്ക് അക്കൗണ്ടുകളും മറ്റ് വ്യക്തിഗത വിവരങ്ങളും ചോര്‍ത്താന്‍ ഹാക്കര്‍മാരെ സഹായിക്കുന്ന ബഗിനെ കണ്ടെത്തിയതിനെ തുടര്‍ന്നാണ് കേന്ദ്രം മുന്നറിയിപ്പ് നല്‍കിയത്.
ആഭ്യന്തര മന്ത്രാലയത്തിന്റെ ഇന്ത്യന്‍ സൈബര്‍ ക്രൈം കോര്‍ഡിനേഷന്‍ വകുപ്പിലെ ത്രെട്ട് അനലിറ്റിക്കല്‍ വിഭാഗമാണ് മുന്നറിയിപ്പ് നല്‍കിയത്. മാല്‍വെയറുകളുടെ ആക്രമണത്തെ തുടര്‍ന്ന് കഴിഞ്ഞ ദിവസം 150-ഓളം ആപ്ലിക്കേഷനുകള്‍ ഗൂഗിള്‍ നീക്കം ചെയ്തിരുന്നു. ഇതിനു തൊട്ടു പിന്നാലെയാണ് ഇത്തരത്തിലെരു സുരക്ഷ വീഴ്ച കണ്ടെത്തിയത്.
ഡാറ്റ ലോഗിന്‍ ചെയ്യാന്‍ കഴിവുള്ള ട്രോജന്‍ വിഭാഗത്തില്‍പ്പെട്ട സ്ട്രാന്‍ഡ്‌ഹോഗ് എന്ന വൈറസിനെയാണ് കണ്ടെത്തിയത്. ചില ആപ്ലിക്കേഷനുകളിലൂടെ വ്യാജ ഓവര്‍ലേ സ്‌ക്രീനുകള്‍ ഉണ്ടാക്കി സെന്‍സിറ്റീവ് ഡാറ്റ നേടാന്‍ ഒരു ഹാക്കറെ സഹായിക്കുകയാണ് വൈറസ് ചെയ്യുന്നത്. ആന്‍ഡ്രോയിഡ്, ആന്‍ഡ്രോയിഡ് 10 ഉള്‍പ്പെടെ എല്ലാ ഫോണുകളെയും വൈറസ് ബാധിക്കും. എന്നാല്‍ ഫോണില്‍ വൈറസ് ബാധിച്ചിട്ടുണ്ടോയെന്ന് തിരിച്ചറിയാന്‍ കഴിയില്ലെന്നും സുരക്ഷ വിഭാഗം വ്യക്തമാക്കുന്നു.
വൈറസ് ബാധിക്കപ്പെട്ട ഉപകരണത്തിലൂടെ സമൂഹ മാധ്യമങ്ങളോ, ഇ-മെയിലോ ഉപയോക്താക്കള്‍ ലോഗിന്‍ ചെയ്യുമ്പോള്‍ ഹാക്കര്‍മാര്‍ക്ക് ഉടന്‍ തന്നെ വിവരം ലഭിക്കും. ഉപയോക്താവിന്റെ മൈക്രോഫോണ്‍, ക്യാമറ, എസ്എംഎസ് സന്ദേശങ്ങള്‍ എന്നിവ ഹാക്കര്‍മാര്‍ക്ക് എളുപ്പം ആകസ്സ് ചെയ്യാന്‍ സാധിക്കും. കൂടാതെ കോണ്‍ടാക്റ്റ് വിശദാംശങ്ങള്‍, കാള്‍ ലിസ്റ്റുകള്‍,സ്വകാര്യ ഇമേജുകള്‍, ഫയലുകള്‍ എന്നിവയും ഇതില്‍ ഉള്‍പ്പെടും.
ഈ വൈറസ് കാരണം 500-ഓളം ജനപ്രിയ ആപ്ലിക്കേഷനുകള്‍ അപകടത്തിലാണെന്ന് ഗൂഗിളും വ്യക്തമാക്കിയിരുന്നു. സ്ട്രാന്‍ഡ്‌ഹോഗിനെ മൂലമുള്ള അപകട സാധ്യതയെ കുറിച്ച് പൊതു ജനങ്ങളില്‍ അവബോധം ഉണ്ടാക്കാനുള്ള നടപടികള്‍ സ്വീകരിക്കുമെന്നും സുരക്ഷ വിഭാഗം അറിയിച്ചു.
ശ്രദ്ധിക്കേണ്ട കാര്യങ്ങള്‍
-നിലവില്‍ നിങ്ങളുടെ ഉപകരണത്തില്‍ ലോഗിന്‍ ചെയ്ത ആപ്ലിക്കേഷന്‍ വീണ്ടും ലോഗിന്‍ ചെയ്യാന്‍ ആവശ്യപ്പെടുന്നുണ്ടെങ്കില്‍ സൂക്ഷിക്കണം.
-അപ്ലിക്കേഷന്റെ പേരുകളില്ലാതെ കാണുന്ന ആക്‌സസ് പോപ്പ്അപ്പുകളെ സൂക്ഷിക്കണം.
-ഒരു ആപ്ലിക്കേഷന്‍ അതുമായി യാതൊരു ബന്ധവുമില്ലാത്ത എന്തെങ്കിലും അനുമതി ആവശ്യപ്പെടുകയാണെങ്കില്‍ ശ്രദ്ധിക്കണം. ഉദാ:കാല്‍ക്കുലേറ്റര്‍ ആപ്ലിക്കേഷന്‍ ജി.പി.എസ് അനുവാദം ചോദിക്കുന്നത്.
-ബാക്ക് ബട്ടണ്‍ സാധാരണ രീതിയില്‍ പ്രവര്‍ത്തിക്കാതിരിക്കുന്നത്.
