ന്യൂഡൽഹി : പൗരത്വ ഭേദഗതി നിയമത്തിൽ അഭിപ്രായം വ്യക്തമാക്കി ഡൽഹി ഷാഹി ഇമാം അഹമ്മദ് ബുഖാരി. പൗരത്വ ഭേദഗതി ഇന്ത്യയിലെ മുസ്ലിങ്ങളെ യാതൊരു കാരണവശാലും ബാധിക്കുന്നതല്ല. എൻ.ആർ.സിയുടെ പേരിലാണ് പ്രതിഷേധമെങ്കിൽ അത് ഇന്ത്യയിൽ പ്രാബല്യത്തിലായിട്ടുമില്ല. അദ്ദേഹം പ്രതികരിച്ചു.
പ്രതിഷേധം നടത്താൻ എല്ലാവർക്കും അവകാശമുണ്ട്. പക്ഷേ അത് സമാധാനപരമാകണം. നിയന്ത്രണത്തോടെ മാത്രമേ പ്രതിഷേധമാകാവൂയെന്നും അദ്ദേഹം ചൂണ്ടിക്കാട്ടി. പൗരത്വ ഭേദഗതിയും എൻ.ആർ.സിയും തമ്മിൽ കാതലായ വ്യത്യാസമുണ്ട്. പൗരത്വ ഭേദഗതി ഇന്ത്യയിൽ നിയമമായിട്ടുണ്ട്. എന്നാൽ ഇത് ഇന്ത്യയിലെ മുസ്ലിങ്ങളെ യാതൊരു കാരണവശാലും ബാധിക്കുന്നില്ല. അദ്ദേഹം വ്യക്തമാക്കി.
കഴിഞ്ഞ ദിവസങ്ങളിൽ ജാമിയ മിലിയ സർവകലാശാലയിലെ വിദ്യാർത്ഥികൾ വലിയ അക്രമങ്ങൾ പ്രതിഷേധത്തിന്റെ ഭാഗമായി നടത്തിയിരുന്നു. തുടർന്ന് ഡൽഹിയിലെ വിവിധ ഭാഗങ്ങളിലും അക്രമ സംഭവങ്ങൾ അരങ്ങേറിയിരുന്നു. ഇതേത്തുടർന്നാണ് സമാധാനപരമായി മാത്രമേ പ്രതിഷേധം നടത്താവൂ എന്ന ആഹ്വാനവുമായി ഷാഹി ഇമാം രംഗത്തെത്തിയത്.
ഡൽഹി ജുമാ മസ്ജിദ് ഇമാം ആണ് ഷാഹി അഹമ്മദ് ബുഖാരി. ഇന്ത്യയിലെ തന്നെ ഏറ്റവും വലിയ മുസ്ലിം പള്ളികളിൽ ഒന്നാണ് ഡൽഹി ജുമാ മസജിദ്.
