പാലക്കാട്: ഷൊർണൂർ–ഒറ്റപ്പാലം റെയിൽവേ പാതയിൽ ട്രാക്കിന് മുകളിൽ സിമന്റ് കട്ട ഉൾപ്പെടെയുള്ള ഭാരമേറിയ വസ്തുക്കൾ കണ്ടെത്തിയ സംഭവത്തിൽ ബിഹാർ സ്വദേശി ഷുക് ലാൽ മറിയ അറസ്റ്റിൽ. ട്രാക്കിൽ സിമന്റ് കട്ട വെച്ചത് താനാണെന്ന് പ്രതി സമ്മതിച്ചു. ജോലി ലഭിക്കാത്തതിലുള്ള മാനസിക സമ്മർദമാണ് ഇതിന് കാരണമായി ഇയാൾ പറഞ്ഞതെന്ന് ആർപിഎഫ് അറിയിച്ചു. സംഭവസമയത്ത് പ്രതി മദ്യപിച്ചിരുന്നതായും ആർപിഎഫ് വ്യക്തമാക്കിയിട്ടുണ്ട്. പ്രതിയെ ഒറ്റപ്പാലം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതിയിൽ ഹാജരാക്കും.
ചൊവ്വാഴ്ച രാവിലെ ഒറ്റപ്പാലത്തിനും ഷൊർണൂരിനും ഇടയിൽ മൂന്ന് സ്ഥലങ്ങളിലാണ് റെയിൽവേ ട്രാക്കിൽ ഭാരമേറിയ വസ്തുക്കൾ കണ്ടെത്തിയത്. മാന്നനൂരിന് സമീപം ട്രാക്കിൽ കോൺക്രീറ്റ് സ്ലാബ് കണ്ടെത്തിയതിനെ തുടർന്ന് റെയിൽവേ ജീവനക്കാർ ഉടൻ അത് നീക്കം ചെയ്തു. തുടർന്ന് ഷൊർണൂരിന് സമീപം ട്രാക്കിൽ ഇരുമ്പ് റെയിൽ കഷ്ണവും മാന്നനൂരിനും ഷൊർണൂരിനും ഇടയിലെ പാതയിൽ കട്ടപിടിച്ച സിമന്റ് നിറച്ച ചാക്കും കണ്ടെത്തി.
രാവിലെ റെയിൽവേ സിഗ്നൽ ആൻഡ് ടെലികമ്മ്യൂണിക്കേഷൻ വിഭാഗം ജീവനക്കാരാണ് ആദ്യം സ്ലാബ് കണ്ടെത്തിയത്. പിന്നീട് ട്രെയിൻ ലോക്കോ പൈലറ്റും ട്രാക്കിലെ മറ്റ് വസ്തുക്കളെക്കുറിച്ച് വിവരം നൽകി. തുടർന്ന് ആർപിഎഫ് ഉദ്യോഗസ്ഥർ സ്ഥലത്തെത്തി പരിശോധന നടത്തി. റെയിൽവേ എൻജിനീയറിങ് വിഭാഗം ട്രാക്ക് പരിശോധിച്ച് സുരക്ഷിതമാണെന്ന് ഉറപ്പുവരുത്തിയ ശേഷമാണ് ഗതാഗതം തുടരാൻ അനുമതി നൽകിയത്. സംഭവത്തെ തുടർന്ന് ട്രെയിൻ ഗതാഗതം തടസ്സപ്പെട്ടില്ലെന്നാണ് റിപ്പോർട്ട്.
ട്രാക്കിൽ ഭാരമേറിയ വസ്തുക്കൾ കണ്ടെത്തിയതോടെ ട്രെയിൻ അട്ടിമറിക്കാനുള്ള ശ്രമമാണോ നടന്നതെന്ന സംശയം ഉയർന്നിരുന്നു. സംഭവവുമായി ബന്ധപ്പെട്ട് സംശയാസ്പദമായ സാഹചര്യത്തിൽ കണ്ടെത്തിയ ഷുക് ലാൽ മറിയയെ ആർപിഎഫ് കസ്റ്റഡിയിലെടുത്ത് ചോദ്യം ചെയ്തത്,
