വിശാഖപട്ടണം: വെസ്റ്റ് ഇന്ഡീസിനെതിരായ രണ്ടാം ഏകദിനത്തില് ഇന്ത്യക്ക് 107 റണ്സ് വിജയം. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില് 5 വിക്കറ്റ് നഷ്ടത്തില് 387 റണ്സ് നേടിയപ്പോള് വെസ്റ്റ് ഇന്ഡീസ് 43.3 ഓവറില് 280 റണ്സിന് എല്ലാവരും പുറത്തായി. ഇതോടെ പരമ്പരയില് ഇന്ത്യ വെസ്റ്റ് ഇന്ഡീസിനൊപ്പമെത്തി(1-1).
ആദ്യം ബാറ്റ് ചെയ്ത ഇന്ത്യക്കു വേണ്ടി ഓപ്പണര്മാരായ രോഹിത് ശര്മ്മയും കെ.എല് രാഹുലും പുറത്തെടുത്ത വെടിക്കെട്ട് ബാറ്റിംഗാണ് കൂറ്റന് സ്കോര് സമ്മാനിച്ചത്. ഒന്നാം വിക്കറ്റില് ഇരുവരും ചേര്ന്ന് 227 റണ്സ് നേടി. രോഹിത് ശര്മ്മ 159ഉം രാഹുല് 102ഉം റണ്സ് നേടിയാണ് പുറത്തായത്. നേരിട്ട ആദ്യ പന്തില് തന്നെ നായകന് വിരാട് കോഹ്ലി പുറത്തായി. ശ്രേയസ് അയ്യര് 32 പന്തില് 53 റണ്സും റിഷഭ് പന്ത് 16 പന്തില് 39 റണ്സും നേടി.
വെസ്റ്റ് ഇന്ഡീസിനായി ഷെല്ഡന് കോട്രെല് 2 വിക്കറ്റ് വീഴ്ത്തി. കീമോ പോള്, അല്സാരി ജോസഫ്, കീറോണ് പോള്ളാഡ് എന്നിവര് ഓരോ വിക്കറ്റ് വീതം സ്വന്തമാക്കി.
388 റണ്സെന്ന കൂറ്റന് വിജയലക്ഷ്യവുമായി മറുപടി ബാറ്റിംഗ് ആരംഭിച്ച വെസ്റ്റ് ഇന്ഡീസിന് ഓപ്പണര്മാരായ എവിന് ലൂയിസും(30) ഷായ് ഹോപും(78)മികച്ച തുടക്കം നല്കി. മികച്ച ഫോമിലുള്ള ഹെറ്റ്മെയര് 4 റണ്സില് നില്ക്കവെ റണ് ഔട്ട് ആയത് സന്ദര്ശകര്ക്ക് തിരിച്ചടിയായി. 6 വീതം ബൗണ്ടറികളും സിക്സറുകളും സഹിതം 47 പന്തില് 75 റണ്സ് നേടിയ
നിക്കോളാസ് പൂരനാണ് വിന്ഡീസ് നിരയിലെ ടോപ് സ്കോറര്.
ഇന്ത്യക്കു വേണ്ടി മുഹമ്മദ് ഷമിയും കുല്ദീപ് യാദവും 3 വിക്കറ്റു വീതം വീഴ്ത്തി. ഷായ് ഹോപിന്റെ വിക്കറ്റുള്പ്പെടെ വീഴ്ത്തി ഹാട്രിക് നേടിയ കുല്ദീപ് യാദവിന്റെ പ്രകടനമാണ് മത്സരത്തില് നിര്ണ്ണായകമായത്. ഇതോടെ ഏകദിനത്തില് രണ്ട് ഹാട്രിക്കുകള് സ്വന്തമാക്കുന്ന ആദ്യ താരമായി കുല്ദീപ് മാറി.
