ക്യാംപ്നൂ: ഫുട്ബോള് പ്രേമികള് ആവേശത്തോടെ കാത്തിരുന്ന സ്പാനിഷ് ലീഗിലെ എല് ക്ലാസിക്കോ മത്സരം സമനിലയില്. ബാഴ്സയുടെ ഹോം ഗ്രൗണ്ടായ ക്യാംപ്നൂവില് നടന്ന മത്സരത്തില് ഇരു ടീമുകളും ഗോള് ഒന്നും നേടാതെയാണ് സമനിലയില് പിരിഞ്ഞത്. ഇതോടെ ബാഴ്സക്കും റയലിനും 36 പോയിന്റുകളായെങ്കിലും മികച്ച ഗോള് ശരാശരിയുടെ അനുകൂല്യമുള്ള ബാഴ്സയാണ് ഒന്നാം സ്ഥാനത്ത്.
ഗോള് അകന്നു നിന്നെങ്കിലും മികച്ച പോരാട്ടത്തിനാണ് ക്യംപ്നൂ വേദിയായത്. സ്വന്തം കാണികള്ക്കു മുന്നില് ബാഴ്സ മികച്ച കളി പുറത്തെടുത്തെങ്കിലും മത്സരത്തില് ഉടനീളം റയലിനായിരുന്നു മുന് തൂക്കം. ബാഴ്സ ഗോള് മുഖം ലക്ഷ്യമാക്കി റയല് താരങ്ങള് നിരന്തരമായി ആക്രമണം നടത്തിക്കൊണ്ടേയിരുന്നു. ഇതിനിടെ ഗ്യാരത് ബെയ്ല് ഗോള് നേടിയെങ്കിലും റഫറി ഓഫ് സൈഡ് വിളിക്കുകയായിരുന്നു. ഗോള് നേടാനുള്ള ഒരു മികച്ച അവസരം ബാഴ്സ താരം ജോര്ഡി ആല്ബയും നഷ്ടമാക്കി.
എല്ലാ എല് ക്ലാസിക്കോ പോരാട്ടങ്ങള്ക്കും സമാനമായി ഇത്തവണയും ഫൗളുകള്ക്കു കുറവുണ്ടായില്ല. മത്സരത്തില് മൊത്തം 8 മഞ്ഞ കാര്ഡുകളാണ് പിറന്നത്. ബാഴ്സയുടെ മൂന്ന് താരങ്ങള് (റാകിടിച്ച്, സ്വാരെസ്, ലെങ്ലെറ്റ്) ആദ്യ പകുതിയില് തന്നെ മഞ്ഞ കാര്ഡു കണ്ടപ്പോള് റയല് താരങ്ങള് (കസിമിറോ, ബെയ്ല്, ഇസ്കോ, റാമോസ്, കാര്വാള്) രണ്ടാം പകുതിയിലാണ് അവശേഷിക്കുന്ന 5 മഞ്ഞ കാര്ഡുകള് കണ്ടത്.
