ന്യൂഡല്ഹി: ഏകദിന ക്രിക്കറ്റിലെ ജൈത്രയാത്ര തുടര്ന്ന് ടീം ഇന്ത്യ. ഒരു പതിറ്റാണ്ടിന് വിരാമമാകുമ്പോള് ഏറ്റവും കൂടുതല് വിജയങ്ങളുമായി ടീം ഇന്ത്യയാണ് ഒന്നാമത്. ഓസ്ട്രേലിയയെ മറികടന്നാണ് ഇന്ത്യ ഒന്നാം സ്ഥാനത്ത് എത്തിയത്.
2011ലെ ഏകദിന ലോകകപ്പും 2013ലെ ചാംപ്യന്സ് ട്രോഫിയും നേടിയതോടെയാണ് ഇന്ത്യ പട്ടികയില് ഒന്നാമതെത്തിയിരിക്കുന്നത്. ഇതിനു പുറമെ ഏകദിനത്തില് ഇന്ത്യ എത്രത്തോളം ആധിപത്യം പുലര്ത്തിയിരുന്നു എന്നതാണ് ഇന്ത്യയുടെ വിജയ പരാജയങ്ങളുടെ കണക്കുകള് വ്യക്തമാക്കുന്നത്. 2010 ജനുവരി 1നും 2019 ഡിസംബര് 22നും ഇടയില് ആകെ 249 മത്സരങ്ങളാണ് ഇന്ത്യ കളിച്ചത്. ഇതില് 157 മത്സരങ്ങളിലും വിജയിച്ച ഇന്ത്യ 79 മത്സരങ്ങളില് മാത്രമാണ് പരാജയപ്പെട്ടത്. 6 കളികള് സമനിലയിലായപ്പോള് 7 എണ്ണം ഉപേക്ഷിക്കുകയായിരുന്നു.
കഴിഞ്ഞ പതിറ്റാണ്ടിലെ മികച്ച ടീമായിരുന്ന ഓസ്ട്രേലിയയാണ് ഇന്ത്യക്ക് പിന്നില് രണ്ടാമത്. 216 മത്സരങ്ങളാണ് ഓസ്ട്രേലിയ ഈ കാലയളവിനുള്ളില് പൂര്ത്തിയാക്കിയത്. ഇതില് 125 മത്സരങ്ങളിലാണ് ഓസീസ് ജയിച്ചത്. നിലവിലെ ഏകദിന ചാംപ്യന്മാരായ ഇംഗ്ലണ്ട് മൂന്നാം സ്ഥാനത്താണ്. 218 മത്സരങ്ങളില് 123 വിജയങ്ങളാണ് ഇംഗ്ലണ്ട് സ്വന്തമാക്കിയത്.
വെസ്റ്റ് ഇന്ഡീസിനെതിരായ പരമ്പരയും സ്വന്തമാക്കിയതിലൂടെ ഈ പതിറ്റാണ്ടില് ഏറ്റവും കൂടുതല് ഏകദിന പരമ്പരകള് വിജയിച്ച ടീമായും ഇന്ത്യ മാറി. 35 ഏകദിന പരമ്പരകളാണ് ഇന്ത്യ സ്വന്തമാക്കിയത്. 32 പരമ്പര വിജയങ്ങളുമായി ഇംഗ്ലണ്ട് രണ്ടാമതും 30 പരമ്പരകളുമായി ഓസ്ട്രേലിയ മൂന്നാമതുമാണ്.
