ബാഴ്സലോണ: ഫ്രീ കിക്കുകൾ കൊണ്ട് ആരാധകരെ എപ്പോഴും അമ്പരപ്പിക്കുന്ന താരമാണ് റെക്കോഡുകളുടെ തോഴൻ കൂടിയായ അർജന്റീനിയൻ ഫുട്ബോളർ ലയണൽ മെസി. പ്രതിരോധ നിരക്കാരുടെ മുകളിലൂടെ ഗോൾ കീപ്പറെ കാഴ്ചക്കാരനാക്കി പോസ്റ്റിന്റെ മൂലയിലേക്ക് പറന്നിറങ്ങുന്ന മെസ്സിയുടെ ഫ്രീ കിക്ക് ഗോളുകള് അത്ഭുതകരമായാണ് ആരാധകർ വിശേഷിപ്പിക്കുന്നത്.
ഇപ്പോഴിതാ തന്റെ ഫ്രീ കിക്കുകളുടെ രഹസ്യം വെളിപ്പെടുത്തുകയാണ് മെസി. ലാലിഗയുടെ 90-ാം വാർഷികമാഘോഷിക്കുന്ന വേളയിൽ നൽകിയ പ്രത്യേക അഭിമുഖത്തിലാണ് മെസി തന്റെ ഫ്രീ കിക്ക് രഹസ്യം വെളിപ്പെടുത്തിയത്.
അടുത്ത കാലത്തായി താൻ ഫ്രീ കിക്കുകളിൽ പ്രത്യേക പഠനം നടത്തുകയുണ്ടായി. അതിൽ സൂക്ഷമമായി വിശകലനം ചെയ്താണ് ഓരോ മത്സരത്തിനുമിറങ്ങുന്നത്. പ്രതിരോധ നിരയുടെ ക്രമീകരണം അനുസരിച്ചാണ് ഫ്രീ കിക്കെടുക്കുന്നത്. കിക്കെടുക്കുന്നതിന് മുന്പ് പ്രതിരോധനിരയിലെ താരങ്ങൾ അനങ്ങുന്നതും കിക്കിനുശേഷം മാത്രം അവര് ഉയരുന്നതും എങ്ങിനെയാണെന്ന് കണക്കുകൂട്ടിയാണ് ഷോട്ടെടുക്കുന്നത്.
അതിനേക്കാളുപരി കഠിനമായ പരിശീലമാണ് നേട്ടത്തിന് പിന്നിലുള്ളത്. ഓരോ മത്സരം കഴിയുമ്പോഴും കളി മെച്ചപ്പെടുത്തേണ്ടതിനെക്കുറിച്ചും കൂടുതല് ഗോളുകള് നേടുന്നതിനെക്കുറിച്ചുമാണ് താൻ ചിന്തിക്കുന്നതെന്നും മെസി പറഞ്ഞു.
