കൊച്ചി: പുതുവർഷത്തിലെ ആദ്യ ജയം തേടി കേരള ബ്ലാസ്റ്റേഴ്സ് ഇന്നിറങ്ങുന്നു. പട്ടികയിൽ അവസാന സ്ഥാനക്കാരായ ഹൈദരാബാദ് എഫ്സിയാണ് ബ്ലാസ്റ്റേഴ്സിന്റെ എതിരാളികൾ. പരിക്കിന്റെ പിടിയിലായ ബ്ലാസ്റ്റേഴ്സ് ജയം സ്വപ്നം കണ്ടാണ് ഇറങ്ങുന്നത്.
10 മത്സരങ്ങളിൽ നിന്ന് ഒരു ജയവും അഞ്ച് സമനിലയും നാല് തോൽവിയുമടക്കം 8 പോയിന്റാണ് ബ്ലാസ്റ്റേഴ്സിന്റെ സമ്പാദ്യം. പ്ലേ ഓഫ് പ്രതീക്ഷകൾ അസ്തമിച്ച ടീമിന് എന്തെങ്കിലും സാധ്യത തെളിയണമെങ്കിൽ ഇനിയുള്ള മത്സരങ്ങളിൽ ജയം അനിവാര്യമാണ്.
വിജയ വഴിയിൽ തിരിച്ചെത്താനുള്ള കഠിന പരിശ്രമത്തിലാണ് ടീമെന്ന് കോച്ച് എൽക്കോ ഷറ്റോരി പറഞ്ഞു. കളിച്ച പത്ത് മത്സരങ്ങളിലും വ്യത്യസ്ത ടീമുമായാണ് ബ്ലാസ്റ്റേഴ്സ് ഇറങ്ങിയത്. പരിക്ക് മൂലം ടീമിന് സ്ഥിരത നിലനിർത്താനാവുന്നില്ലെന്നും ഷറ്റോരി പറഞ്ഞു.
അതേസമയം രണ്ടാം ജയം ലക്ഷ്യമിട്ടാണ് ഹൈദരാബാദും ഇറങ്ങുന്നത്. 10 മത്സരങ്ങളിൽ നിന്ന് ഒരു ജയവും രണ്ട് സമനിലയും 7 തോൽവിയുമടക്കം 5 പോയിന്റാണ് അവരുടെ സമ്പാദ്യം. ഹൈദരാബാദിന്റെ ആകെയുള്ള ജയം ബ്ലാസ്റ്റേഴ്സിന് എതിരെയായിരുന്നുവെന്നതും ശ്രദ്ധേയം.
