ലണ്ടന്‍: ഇംഗ്ലീഷ് പ്രീമിയര്‍ ലീഗിലെ കരുത്തരായ ലിവര്‍പൂളിന്റെ പ്രമുഖ താരമാണ് സാദിയോ മാനെ. അത്ഭുതകരമായ വേഗവും കൃത്യതയും ഒപ്പം കായിക ക്ഷമതയും ഇഴ ചേര്‍ന്ന കളിക്കാരനാണ് സെനഗലുകാരനായ മാനെ. എന്നാല്‍ കോടികള്‍ ആസ്തിയുള്ള അദ്ദേഹം ഇപ്പോഴും ഡിസ്‌പ്ലെ പൊട്ടിയ സ്മാര്‍ട്ട് ഫോണാണ് ഉപയോഗിക്കുന്നതെന്ന വാര്‍ത്ത അമ്പരപ്പോടെയാണ് ഫുട്‌ബോള്‍ ലോകം കേട്ടത്.
ഏകദേശം 235 കോടി രൂപയുടെ 5 വര്‍ഷത്തെ കരാറാണ് ലിവര്‍പൂളുമായി അദ്ദേഹം ഒപ്പുവെച്ചത്. വര്‍ഷാവര്‍ഷം ശമ്പളവും മറ്റ് ആനുകൂല്യങ്ങളും വേറെയും. അപ്പോള്‍ കാശില്ലാഞ്ഞിട്ടല്ല സാദിയോ ഫോണ്‍ മാറ്റാത്തത്. എന്നാല്‍ താരം പിശുക്കനുമല്ല. പിന്നെ എന്തിനാണ് സാദിയോ മാനെയെപ്പോലെ വിലപിടിപ്പുള്ള ഒരു താരം പൊട്ടിയ ഫോണുമായി നടക്കുന്നതെന്ന ചോദ്യമാണ് സ്വാഭാവികമായി ഉയര്‍ന്നു വരുന്നത്.
‘എനിക്ക് എന്തിനാണ് ഫെരാരിയും വിമാനങ്ങളും വജ്രം പതിപ്പിച്ച വാച്ചുകളും? അതുകൊണ്ട് എനിക്കോ മറ്റുള്ളവര്‍ക്കോ എന്താണ് പ്രയോജനം?’ സാദിയോ മാനെ ചോദിക്കുന്നു. കോടികള്‍ സമ്പാദിക്കുന്നതിലല്ല കാര്യമെന്നും തിരിച്ചറിവാണ് ഏറ്റവും വലുതെന്നുമാണ് മാനെ തന്റെ പ്രവൃത്തിയിലൂടെ വ്യക്തമാക്കുന്നത്. സ്വന്തം രാജ്യത്തെ ജനങ്ങള്‍ ജീവിക്കാനായി പട്ടിണിയോട് മല്ലടിക്കുമ്പോള്‍ ഒരു ആഡംബരവും ഒരു പട്ടുമെത്തയും തനിക്ക് ഉറക്കം തരില്ലെന്ന തിരിച്ചറിവ്.
സാദിയോ മാനെ സെനഗലില്‍ സ്‌കൂളുകള്‍, സ്റ്റേഡിയം എന്നിവ നിര്‍മ്മിച്ചു. തുണി, ചെരുപ്പ്, ഭക്ഷണം എന്നിങ്ങനെ അവശ്യവസ്തുക്കള്‍ ജനങ്ങളിലേക്ക് എത്തിച്ചു കൊണ്ടേയിരുന്നു. ഒരു ഗ്രാമത്തെ മുഴുവന്‍ സ്ഥിര വരുമാനം കൊടുത്ത് ദത്തെടുത്തു. സാദിയോ മാനെ എന്നയാള്‍ വെറുമൊരു കാല്‍പ്പന്ത് കളിക്കാരനല്ല, മറിച്ച് അയാള്‍ ഒരു ഹീറോയാണ്. ഫുട്ബാള്‍ മൈതാനങ്ങളില്‍ മാത്രമല്ല. കോടിക്കണക്കിന് ജനങ്ങളുടെ മനസുകളില്‍…
