ഇന്‍ഡോര്‍: ഇന്ത്യ-ശ്രീലങ്ക ട്വന്റി20 പരമ്പരയിലെ ആദ്യ മത്സരം ഉപേക്ഷിക്കേണ്ടി വന്ന സാഹചര്യം ഇന്‍ഡോറിലുണ്ടാകില്ല. മത്സരം പൂര്‍ണമായും നടത്താനാകുമെന്നാണ് സംഘാടകര്‍ അറിയിക്കുന്നത്. എന്നാല്‍ രാത്രിയില്‍ മഞ്ഞുവീഴ്ചയുണ്ടാകും. ഇതിന് ആവശ്യമായ നടപടികളും സ്വീകരിച്ചതായി അധികൃതര്‍ വ്യക്തമാക്കി.
രാത്രിയില്‍ 14 ഡിഗ്രി മുതല്‍ 16 ഡിഗ്രി വരെയായിരിക്കും തണുപ്പ് അനുഭവപ്പെടുക. ഔട്ട് ഫീല്‍ഡില്‍ ഈര്‍പ്പം തങ്ങി നില്‍ക്കാതിരിക്കാനാവശ്യമായ നടപടികള്‍ സ്വീകരിച്ചു കഴിഞ്ഞെന്നാണ് റിപ്പോര്‍ട്ട്. ഔട്ട് ഫീല്‍ഡില്‍ സ്‌പ്രേ അടിച്ചും കഴിഞ്ഞ മൂന്ന് ദിവസമായി മൈതാനം നനക്കാതെയുമാണ് സൂക്ഷിച്ചിരിക്കുന്നത്.
ഇന്‍ഡോറിലെ ഹോള്‍ക്കര്‍ സ്‌റ്റേഡിയത്തില്‍ ഇതുവരെ കളിച്ച എട്ട് മത്സരങ്ങളിലും ജയം ഇന്ത്യക്കൊപ്പമായിരുന്നു. 2017ല്‍ ഇന്ത്യയും ശ്രീലങ്കയും ഇതിനു മുന്‍പ് ഹോള്‍ക്കറില്‍ ഏറ്റുമുട്ടിയപ്പോള്‍ കൂറ്റന്‍ സ്‌കോറാണ് പിറന്നത്. 43 പന്തില്‍ രോഹിത് അടിച്ചു കൂട്ടിയ 118 റണ്‍സിന്റെ കരുത്തില്‍ ഇന്ത്യ 260 റണ്‍സാണ് നേടിയത്. മത്സരം 88 റണ്‍സിന് ഇന്ത്യ സ്വന്തമാക്കുകയും ചെയ്തിരുന്നു.
