സ്പാനിഷ് സൂപ്പര്‍ കപ്പില്‍ അത്ഭുത ഗോളുമായി ടോണി ക്രൂസ്; കോര്‍ണര്‍ കിക്ക് നേരിട്ട് വലയില്‍

ജിദ്ദ: സ്പാനിഷ് സൂപ്പര്‍ കപ്പില്‍ അത്ഭുത ഗോളുമായി റയല്‍ മാഡ്രിഡ് താരം ടോണി ക്രൂസ്. വലന്‍സിയക്കെതിരെ നടന്ന സെമി ഫൈനല്‍ മത്സരത്തില്‍ കാണികളേയും സ്വന്തം ടീമംഗങ്ങളേയും ഞെട്ടിച്ചാണ് ക്രൂസ് ഗോളടിച്ചത്. കോര്‍ണര്‍ കിക്ക് ഗോളാക്കി മാറ്റിയാണ് ക്രൂസ് വിസ്മയിപ്പിച്ചത്.

15ാം മിനിട്ടിലാണ് റയല്‍ മാഡ്രിഡിന് അനുകൂലമായി കോര്‍ണര്‍ കിക്ക് ലഭിച്ചത്. ക്രൂസ് കിക്കെടുക്കാന്‍ തുടങ്ങുമ്പോള്‍ വലന്‍സിയ ഗോള്‍ കീപ്പര്‍ പോസ്റ്റില്‍ നിന്ന് മുന്നോട്ട് കയറി നില്‍ക്കുകയായിരുന്നു. കളിക്കാരെ നിയന്ത്രിക്കുന്ന ഗോള്‍ കീപ്പറുടെ ശ്രദ്ധ അല്‍പ്പമൊന്നു തെറ്റിയെന്ന് മനസിലാക്കിയ ക്രൂസ് പെട്ടെന്ന് തന്നെ പോസ്റ്റിലേക്ക് ഷൂട്ട് ചെയ്ത് അവസരം മുതലാക്കി. പന്ത് തട്ടിയകറ്റാന്‍ ഗോളി ശ്രമിച്ചെങ്കിലും ഫലമുണ്ടായില്ല.

🎯 He shoots, no one looks, he SCORES!
🤩 @ToniKroos
#RMSuperCopa | #HalaMadrid pic.twitter.com/q8UgEy020a

— Real Madrid C.F. 🇬🇧🇺🇸 (@realmadriden) January 8, 2020

മത്സരം ഒന്നിനെതിരെ മൂന്ന് ഗോളുകള്‍ക്ക് റയല്‍ മാഡ്രിഡ് വിജയിച്ചിരുന്നു. 39ാം മിനിറ്റില്‍ ഇസ്‌കോയാണ് റയലിനായി രണ്ടാം ഗോള്‍ നേടിയത്. 65ാം മിനിറ്റില്‍ ലൂക്കാ മോഡ്രിച്ചാണ് റയല്‍ മാഡ്രിന് മൂന്നാം ഗോള്‍ സമ്മാനിച്ചത്. വിജയത്തോടെ റയല്‍ സ്പാനിഷ് സൂപ്പര്‍ കപ്പിന്റെ ഫൈനലില്‍ പ്രവേശിച്ചു.