ന്യൂഡല്ഹി: ഇന്ത്യയുടെ തദ്ദേശീയ പോര് വിമാനമായ തേജസിന്റെ നാവിക പതിപ്പിന്റെ സുപ്രധാന പരീക്ഷണം വിജയകരമായി പൂര്ത്തിയാക്കി. വിമാനവാഹിനി കപ്പലായ ഐഎന്എസ് വിക്രമാദിത്യയില് നിന്നും പറന്നുയര്ന്ന തേജസിന്റെ പ്രോട്ടോടൈപ്പ് വിമാനം വിജയകരമായി കപ്പലില് ലാന്ഡ് ചെയ്തു. വിമാന വാഹിനി കപ്പലില് ഉപയോഗിക്കാന് കഴിയുന്ന വിമാനങ്ങള് വികസിപ്പിക്കുക എന്ന ലക്ഷ്യമാണ് ഇന്ത്യ കൈവരിച്ചിരിക്കുന്നത്.
ഇന്ന് രാവിലെ 10 മണിയോടെയായിരുന്നു പരീക്ഷണം നടത്തിയത്. കമാന്ഡര് ജയ്ദീപ് മോളങ്കറാണ് പരീക്ഷണ സമയത്ത് തേജസ് വിമാനം പറത്തിയത്. എയറോനോട്ടിക്കല് ഡെവലപ്മെന്റ് ഏജന്സിയും ഡിആര്ഡിഒയും ചേര്ന്നാണ് തേജസ് യുദ്ധവിമാനത്തിന്റെ നാവിക സേനാ പതിപ്പ് വികസിപ്പിച്ചത്.
കഴിഞ്ഞ സെപ്തംബറില് തേജസ് അറസ്റ്റഡ് ലാന്ഡിംഗ് വിജയകരമായി പൂര്ത്തിയാക്കിയിരുന്നു. ഗോവയിലെ ഐ എന് എസ് ഹന്സയില് വെച്ചാണ് തേജസ് വിമാനത്തിന്റെ അറസ്റ്റഡ് ലാന്ഡിംഗ് വിജയകരമായി പൂര്ത്തീകരിച്ചത്. ഇന്ത്യന് നാവിക സേനാ ചരിത്രത്തിലെ സുവര്ണ നേട്ടമായിരുന്നു അത്. ഇന്ത്യ വികസിപ്പിച്ചു കൊണ്ടിരിക്കുന്ന ഇരട്ട എഞ്ചിന് യുദ്ധ വിമാനങ്ങളുടെ നാവിക പതിപ്പുകളിലും ഈ സാങ്കേതിക വിദ്യ ഉപയോഗിക്കാന് കഴിയും.
