ജക്കാര്‍ത്ത: ലോക ബാഡ്മിന്റണ്‍ സീരീസിലെ 2020 ഇന്തോനേഷ്യന്‍ സൂപ്പര്‍ സീരീസിന് ഇന്ന് തലസ്ഥാന നഗരമായ ജക്കാര്‍ത്തയില്‍ തുടക്കമാകും. ലോക സീരീസ് 500ല്‍ ഉള്‍പ്പെട്ടിട്ടുള്ള മത്സരത്തില്‍ ലോകതാരങ്ങളെല്ലാം മാറ്റുരക്കും. മലേഷ്യന്‍ മാസ്റ്റേഴ്‌സില്‍ ക്വാര്‍ട്ടര്‍ ഘട്ടംവരെയെത്തിയ ഇന്ത്യയുടെ വനിതാതാരങ്ങളിലാണ് കൂടുതല്‍ പ്രതീക്ഷ.
ഇതിനിടെ പുരുഷവിഭാഗത്തില്‍ ലോക ഒന്നാം നമ്പറും ജപ്പാന്റെ കിരീട പ്രതീക്ഷയുമായ മൊമോട്ടോ വാഹനാപകടം കാരണം കളിക്കാനാവാത്തതിന്റെ നിരാശയിലാണ്. മൂക്കിന് പരിക്കേറ്റതിനാല്‍ മൂന്നുമാസത്തെ വിശ്രമമാണ് നിര്‍ദ്ദേശിച്ചിരിക്കുന്നത്.
ഇന്ത്യന്‍ നിരയില്‍ സൈനയും സിന്ധുവും സീസണിലെ കിരീട സാധ്യതക്കുള്ള പോരാട്ടം തന്നെയാകും ആരാധകര്‍ ഉറ്റുനോക്കുന്നത്. രണ്ടാം റൗണ്ടുമുതല്‍ കളിക്കാനിറങ്ങുന്ന സൈനയുടെ എതിരാളി ജപ്പാന്റെ സയായാ താക്കാഹാഷിയും സിന്ധുവിന്റെ എതിരാളി ജപ്പാന്റെ തന്നെ അയാ ഒഹോരിയുമാണ്.
പുരുഷവിഭാഗത്തില്‍ മലേഷ്യയിലെ ആദ്യ മത്സരത്തില്‍ പുറത്തായ കിഡംബി ശ്രീകാന്ത് മികച്ച പ്രകടനം പുറത്തെടുക്കുമെന്നാണ് ആരാധകരുടെ പ്രതീക്ഷ. ഇന്തോനേഷ്യയുടെ ഷേസാര്‍ ഹിരണ്‍ റുസ്താവിതോയാണ് എതിരാളി. എച്ച്. എസ്. പ്രണോയിയും സായി പ്രണീതും കശ്യപും അടക്കമുള്ള മികച്ച നിര സീസണിലെ രണ്ടാം ടൂര്‍ണ്ണമെന്റിലിറങ്ങുകയാണ്.
