ദുബായ്: ഐസിസി 2019ലെ മികച്ച ക്രിക്കറ്റ് പുരസ്‌ക്കാരങ്ങള്‍ പ്രഖ്യാപിച്ചു. 2019ലെ ഐസിസി ക്രിക്കറ്റര്‍ ഓഫ് ദ ഇയറായി ഇന്ത്യന്‍ ഉപനായകനും ഹിറ്റ്മാനുമായ രോഹിത് ശര്‍മയെ പ്രഖ്യാപിച്ചു. സ്പിരിറ്റ് ഓഫ് ദ ക്രിക്കറ്റ് ബഹുമതി ഇന്ത്യന്‍ നായകന്‍ വിരാട് കോഹ്‌ലിക്കാണ്.
ലോകക്രിക്കറ്റില്‍ കഴിഞ്ഞ ഒരു വര്‍ഷം ഏറ്റവും മികച്ച ബാറ്റ്‌സുമാനും റണ്‍വേട്ടക്കാരനുമായി തിളങ്ങിയ രോഹിത് ശര്‍മ ടെസ്റ്റിലും ഏകദിനത്തിലും ടി20യിലും ഇന്ത്യയുടെ ഏറ്റവും വിശ്വസ്തനായതാരമായി മാറിക്കഴിഞ്ഞു. ലോകകപ്പില്‍ 5 സെഞ്ച്വറി നേട്ടം കൊയ്യുന്ന ആദ്യതാരമായും ഏറ്റവും കൂടുതല്‍ റണ്‍സ് നേടിയ താരമായും രോഹിത് മാറി.
കഴിഞ്ഞ ലോകകപ്പില്‍ ഓസ്‌ട്രേലിയയുടെ സ്റ്റീവ് സ്മിത്തിനെതിരെ കാണികള്‍ കൂവിയതിനോട് മികച്ച രീതിയില്‍ പ്രതികരിക്കുകയും കാണികളോട് കളിയാക്കരുതെന്ന് ആംഗ്യം കാണിക്കുകയും ചെയ്ത ഇന്ത്യന്‍ നായകന്‍ വിരാട് കോഹ്‌ലിയുടെ കളിക്കളത്തിലെ മാന്യതക്കാണ് സ്പിരിറ്റ് ഓഫ് ദ ക്രിക്കറ്റ് അവാര്‍ഡ് സ്മ്മാനിക്കുന്നത്.
ഇവര്‍ക്കൊപ്പം ഐസിസി ലോക താരത്തിനുള്ള പുരസ്‌കാരം ഇംഗ്ലണ്ടിന്റെ ബെന്‍ സ്റ്റോക്‌സിനാണ് ലഭിക്കുക. സര്‍ ഗാരീഫീല്‍ഡ് സോബേഴ്‌സിന്റെ പേരിലുള്ള ട്രോഫിയാണ് നല്‍കുക. മികച്ച ടെസ്റ്റ് ക്രിക്കറ്ററായി ഓസ്‌ട്രേലിയയുടെ പാറ്റ് കമ്മിന്‍സ് തിരഞ്ഞെടുക്കപ്പെട്ടു. 59 ടെസ്റ്റ് വിക്കറ്റുകളെടുത്ത നേട്ടമാണ് ബഹുമതിക്കര്‍ഹനാക്കിയത്.
ഇവക്കൊപ്പം ഐസിസി ലോകടീമുകലേയും പ്രഖ്യാപിച്ചു. ലോക ഏകദിന ഇലവനില്‍ കോഹ്‌ലിയും, രോഹിത് ശര്‍മയും മുഹമ്മദ് ഷമിയും കുല്‍ദീപ് യാദവും സ്ഥാനം പിടിച്ചു.
