ജക്കാര്‍ത്ത: ഇന്തോനേഷ്യന്‍ മാസ്‌റ്റേഴ്‌സില്‍ ആദ്യ റൗണ്ടില്‍ത്തന്നെ ഇന്ത്യക്ക് തിരിച്ചടി. പുരുഷവിഭാഗം സിംഗിള്‍സില്‍ പ്രതീക്ഷയായിരുന്ന കിഡംബി ശ്രീകാന്ത് പുറത്തായി. ഇന്തോനേഷ്യയുടെ ഷേസാര്‍ ഹിരണ്‍ റുസ്താവിതോയോടാണ് 21-18, 12-21, 14-21ന് ശ്രീകാന്ത് തോറ്റത്. ആദ്യ ഗെയിം മികച്ച പോരാട്ടത്തിനൊടുവില്‍ 21-18 ന് നേടിയ ശ്രീകാന്തിന് മേല്‍ അടുത്ത രണ്ടു ഗെയിമുകളും നേടിക്കൊണ്ട് ഷേസാര്‍ ആദ്യജയം സ്വന്തമാക്കി.
പുരുഷവിഭാഗം രണ്ടാം മത്സരത്തില്‍ സൗരഭ് വെര്‍മ 21-17, 13-21, 10-21ന് ചൈനയുടെ ലൂ ഗുആങ്ങ് സൂ വിനോടാണ് പരാജയപ്പെട്ടത്. ആദ്യ ഗെയിം നേടിയിട്ടും ആ മുന്‍തൂക്കം സൗരഭിന് തുടരാനായില്ല.
