രാജ്കോട്ട്: ഓസ്ട്രേലിയക്കെതിരായ രണ്ടാം ഏകദിനത്തിലും ഇന്ത്യന് നായകന് വിരാട് കോഹ്ലിയെ പുറത്താക്കി ആദം സാംപ. ഇതോടെ ഏറ്റവും കൂടുതല് തവണ കോഹ്ലിയെ പുറത്താക്കുന്ന താരമെന്ന നേട്ടമാണ് സാംപ സ്വന്തമാക്കിയിരിക്കുന്നത്. പരമ്പരയില് തുടര്ച്ചയായി രണ്ടാം തവണയാണ് സാംപ കോഹ്ലിയെ പുറത്താക്കുന്നത്.
ഇന്നിംഗ്സിന്റെ തുടക്കം മുതല് സാംപയെ ശ്രദ്ധയോടെയാണ് കോഹ്ലി നേരിട്ടത്. എന്നാല് 44ാം ഓവറിലാണ് സാംപയെ സിക്സറിനു പറത്താനുള്ള കോഹ്ലിയുടെ ശ്രമം പിഴച്ചത്. ബൗണ്ടറി ലൈനില് ആഷ്ടണ് ആഗറും മിച്ചല് സ്റ്റാര്ക്കും ചേര്ന്നാണ് കോഹ്ലിയെ പുറത്താക്കിയത്. 76 പന്തില് 78 രണ്സ് നേടിയാണ് കോഹ്ലി മടങ്ങിയത്.
ഏകദിന-ട്വന്റി20 മത്സരങ്ങളിലായാണ് സാംപ കോഹ്ലിയെ പൂട്ടിയത്. ആദ്യ ഏകദിനത്തില് 18 പന്തില് 16 റണ്സ് എടുത്തു നില്ക്കവെ സാംപക്ക് റിട്ടേണ് ക്യാച്ച് നല്കിയാണ് കോഹ്ലി മടങ്ങിയത്. കോഹ്ലിയെ ഇത്രയധികം തവണ പുറത്താക്കിയ മറ്റൊരു താരം വെസ്റ്റ് ഇന്ഡീസ് പേസര് രവി രാംപോള് മാത്രമാണ്. എന്നാല് സാംപക്കെതിരെ കോഹ്ലിയുടെ സ്ട്രൈക്ക് റേറ്റ് 100നു മുകളിലാണെന്നതും കൗതുകമുണര്ത്തുന്നു.
