വിശാഖപട്ടണം: വിശാഖപട്ടണത്ത് നടന്ന 57-ാം മത് ദേശീയ റോളർ സ്പോർട്സ് ചാമ്പ്യൻഷിപ്പിൽ കേരളത്തിന് മികച്ച നേട്ടം. 8സ്വർണ്ണം, 4വെള്ളി, 7വെങ്കലം എന്നിങ്ങനെ 19മെഡലുകളാണ് കേരള ടീം കരസ്ഥമാക്കിയത്.
സ്കേറ്റ് ബോർഡിംഗ്, ആർട്ടിസ്റ്റിക് സ്കേറ്റിംഗ്, ഇൻലൈൻ ഫ്രീ സ്റ്റൈൽ സ്കേറ്റിങ്, ഇൻലൈൻ ആൽപൈൻ സ്കേറ്റിംഗ്, സ്പീഡ് സ്കേറ്റിംഗ് തുടങ്ങിയ ഇനങ്ങളിലാണ് കേരളത്തിൽ നിന്നുള്ള മത്സരാർത്ഥികൾ നേട്ടം കൊയ്തത്. റോളർ ഹോക്കി ആൺകുട്ടികളുടെ വിഭാഗത്തിൽ സബ് ജൂനിയർ, ജൂനിയർ, സീനിയർ ടീമുകൾ ചാമ്പ്യൻഷിപ്പിലുടനീളം മികച്ച പ്രകടനം കാഴ്ചവെച്ചങ്കിലും മെഡലുകളൊന്നും നേടാനായില്ല.
കേരളത്തിൽ മികച്ച കഴിവുകളുള്ള കുട്ടികൾ ധാരാളമുണ്ടെങ്കിലും പരിശീലനത്തിനുള്ള ട്രാക്കുകളുടെ അഭാവം പരിശീലനത്തെ കാര്യമായി ബാധിക്കുന്നുണ്ടെന്ന് റോളർ സ്കേറ്റിങ് ഫെഡറേഷൻ ഓഫ് ഇന്ത്യ ജോയിന്റ് സെക്രട്ടറി ബിവിഎൻ റെഡ്ഡി പറഞ്ഞു. നിലവിൽ കേരളത്തിൽ റോളർ സ്കേറ്റിംഗ് പരിശീലിക്കാനാവശ്യമായ ‘ബാങ്ക് ട്രാക്കുകൾ’ ഒന്നും തന്നെയില്ല. രാജ്യത്തിനകത്തും പുറത്തുനിന്നുമായി ഏറ്റവും മികച്ച പരിശീലകരെ എത്തിച്ച് കുട്ടികൾക്ക് മികച്ച പരിശീലനം നൽകാൻ സ്കേറ്റിംഗ് അക്കാദമികളും, അസോസിയേഷനും തയ്യാറാകുമ്പോഴും ട്രാക്കുകളുടെ അഭാവം മൂലം അത് വേണ്ട രീതിയിൽ ഫല പ്രാപ്തിയിൽ എത്തുന്നില്ല.
ഈ സാഹചര്യത്തിൽ ദേശീയ ചാമ്പ്യൻഷിപ്പുകളിൽ പങ്കെടുക്കാൻ ഒരുങ്ങുന്ന കുട്ടികൾ കേരളത്തിന് പുറത്ത് കോയമ്പത്തൂർ, മൈസൂർ, ബാംഗ്ലൂർ എന്നിവിടങ്ങളിലെ ട്രാക്കുകളെയാണ് ആശ്രയിക്കുന്നത്. ഇത്രയും ദൂരയുള്ള ട്രാക്കുകളിൽ പരിശീലനം നടത്തുക എന്നത് അപ്രായോഗികമാണ്. പരിശീലനത്തിനായി കേരളത്തിൽ ഒരു ബാങ്ക് ട്രാക്കെങ്കിലും ലഭ്യമായാൽ ദേശീയ അന്തർദേശീയ മത്സരങ്ങളിൽ മികച്ച നേട്ടങ്ങൾ കൈവരിക്കാൻ കേരളത്തിന് സാധിക്കും.
നിലവിലെ പ്രതികൂല സാഹചര്യങ്ങളിലും മത്സരാർത്ഥികൾ തിളക്കമാർന്ന നേട്ടമാണ് കൈവരിച്ചത്. സ്പെയിനിലെ ബാഴ്സലോണയിൽ 2019 ൽ നടന്ന വേൾഡ് റോളർ ഗെയിംസ് 2019ൽ ജൂനിയർ മെൻ ആർട്ടിസ്റ്റിക് ഇൻലൈൻ ഫ്രീ സ്കേറ്റിങ് വിഭാഗത്തിൽ ഇന്ത്യയെ പ്രാതിനിധീകരിച്ച് കേരളത്തിൽ നിന്നുള്ള അഭിജിത്ത് അമൽ രാജ് സ്വർണ മെഡൽ കരസ്ഥമാക്കിയിരുന്നു. ഈ സാഹചര്യത്തിൽ പരിശീലന ട്രാക്കുകളുടെ ബന്ധപ്പെട്ട് അധികാരികൾ അനുകൂല നടപടികൾ കൈക്കൊള്ളുമെന്നാണ് പ്രതീക്ഷയെന്നും കേരള റോളർ സ്കേറ്റിങ് അസോസിയേഷൻ സീനിയർ വൈസ് പ്രസിഡന്റ് കൂടിയായ ബിവിഎൻ റെഡ്ഡി വ്യക്തമാക്കി.
