ജംഷഡ്പൂർ: ഇന്ത്യൻ സൂപ്പർ ലീഗ് ഫുട്ബോളിൽ തുടർച്ചയായ മൂന്നാം ജയം ലക്ഷ്യമിട്ട് കേരള ബ്ലാസ്റ്റേഴ്സ് ഇന്നിറങ്ങുന്നു. ജംഷഡ്പൂർ എഫ്സിയാണ് ബ്ലാസ്റ്റേഴ്സിന്റെ എതിരാളികൾ. അവസാന നാലിലേക്കെത്തിപ്പെടാനുള്ള ബ്ലാസ്റ്റേഴ്സിന്റെ നിർണായക മത്സരങ്ങളിലൊന്നാണിത്. വൈകുന്നേരം ഏഴ് മുപ്പതിന് ജംഷഡ്പൂരിലെ ജെആർഡി ടാറ്റ കോംപ്ലക്സ് സ്റ്റേഡിയത്തിലാണ് മത്സരം.
വിജയം കാണാത്ത ഒൻപതു മത്സരങ്ങൾക്കപ്പുറം അഞ്ചു ഗോളുകൾക്ക് ഹൈദരാബാദിനെതിരായ അത്യുഗ്രൻ വിജയം കരസ്ഥമാക്കിയ ടീം കൊൽക്കത്തക്കെതിരെ നടന്ന അവസാനമത്സരത്തിൽ ഒരു ഗോളിന് വിജയം നേടിയിരുന്നു. തുടർച്ചയായ രണ്ടു വിജയത്തിന്റെ പിൻബലത്തിൽ സ്ഥാനങ്ങൾ മെച്ചപ്പെടുത്തിയ ടീം അവസാന നാലിലേക്ക് കടക്കാനായുള്ള പ്രയത്നത്തിലാണ്.
അവസാനം നടന്ന മൂന്നു മത്സരങ്ങളിൽ തുടർച്ചയായി ജംഷഡ്പൂർ പരാജയപ്പെട്ടിരുന്നു. ഒപ്പം തന്നെ അവസാന ആറു മത്സരങ്ങൾ അവർക്ക് ജയിക്കാനുമായിരുന്നില്ല. ബംഗളൂരുവിനെതിരായ അവസാന മത്സരത്തിൽ രണ്ടു ഗോളുകൾ വഴങ്ങി പരാജയപ്പെട്ട ടീമിന് ഗോൾ കണ്ടെത്താനായിരുന്നില്ല. ബ്ലാസ്റ്റേഴ്സിനെതിരായ അവസാന മത്സരത്തിൽ രണ്ട് ഗോൾ വഴങ്ങിയ ശേഷമായിരുന്നു ജംഷഡ്പൂർ സമനില വഴങ്ങിയത്.
