മദ്ദാറാം ഇനി കളിക്കുക സ്വന്തം ക്രിക്കറ്റ് കിറ്റുകൊണ്ട്; കമ്മ്യൂണിസ്റ്റ് ഭീകരരുടെ താവളമായ ബസ്തറില്‍ ക്രിക്കറ്റ് കളിച്ച് മനം കവര്‍ന്ന ദിവ്യാംഗനായ കുട്ടിക്ക് സച്ചിന്റെ സമ്മാനം

റായ്പൂര്‍: മദ്ദാറാം എന്ന ദിവ്യാംഗനായ കുട്ടിയുടെ ജീവിതത്തിലെ മറക്കാനാകാത്ത ദിനങ്ങളാണ് കടന്നുപോയിക്കൊണ്ടിരിക്കുന്നത്. മദ്ദാറാം ക്രിക്കറ്റ് കളിക്കുന്ന വീഡിയോ കഴിഞ്ഞ ദിവസം സമൂഹ മാദ്ധ്യമങ്ങളില്‍ വലിയ രീതിയില്‍ പ്രചരിച്ചിരുന്നു. സച്ചിന്‍ ടെണ്ടുല്‍ക്കര്‍ പോലും ട്വീറ്റ് ചെയ്ത വീഡിയോ നിരവധിയാളുകളാണ് പങ്കുവെച്ചത്. ഇതിനു പിന്നാലെ മദ്ദാറാമിന് സച്ചിന്‍ നേരിട്ട് ക്രിക്കറ്റ് കിറ്റ് സമ്മാനമായി നല്‍കിയിരിക്കുകയാണ്.

‘ഞാന്‍ ഹൃദയത്തോട് ചേര്‍ത്തുവെച്ച കളിയാണ് ക്രിക്കറ്റ്. ക്രിക്കറ്റ് ഇതിഹാസം നല്‍കിയ സമ്മാനം സ്വീകരിച്ച ഈ ദിവസം ജീവിതത്തില്‍ മറക്കാന്‍ കഴിയില്ല. ഈ ബാറ്റ് കൈയ്യില്‍ പിടിക്കുമ്പോള്‍ ഞാന്‍ ആരാവണമെന്ന് ആഗ്രഹിച്ചോ അത് സാക്ഷാത്കരിക്കപ്പെട്ട അനുഭൂതിയാണ് ലഭിക്കുന്നത്. കഴിഞ്ഞ ഒരു വര്‍ഷമായി ഞാന്‍ ക്രിക്കറ്റ് കളിക്കുന്നു. ഇതിനോടകം തന്നെ ക്രിക്കറ്റ് എന്റെ ജീവിതത്തിന്റെ ഭാഗമായി മാറിക്കഴിഞ്ഞിരിക്കുന്നു’. മദ്ദാറാം പറഞ്ഞു.

Start your 2020 with the inspirational video of this kid Madda Ram playing cricket 🏏 with his friends.
It warmed my heart and I am sure it will warm yours too. pic.twitter.com/Wgwh1kLegS

— Sachin Tendulkar (@sachin_rt) January 1, 2020

സച്ചിന്‍ സമ്മാനിച്ച ക്രിക്കറ്റ് കിറ്റ് അത്യധികം സന്തോഷത്തോടെയാണ് മദ്ദാറാം സ്വീകരിച്ചത്. സച്ചിന്റെ മാനേജരാണ് മദ്ദാറാമിന് കിറ്റ് സമ്മാനിച്ചത്. കിറ്റിനൊപ്പം ക്രിക്കറ്റ് കളിച്ചുകൊണ്ടേയിരിക്കണമെന്ന സന്ദേശവും സച്ചിന്‍ മദ്ദാറാമിന് നല്‍കി. തന്റെ പ്രിയപ്പെട്ട താരം നല്‍കിയ ബാറ്റ് നെഞ്ചോട് ചേര്‍ത്ത് മദ്ദാറാം സച്ചിന്റെ സന്ദേശം ഉറക്കെ വായിക്കുന്ന ചിത്രങ്ങളും വീഡിയോകളും ഇതിനോടകം പുറത്തുവന്നിട്ടുണ്ട്.