ബംഗളൂരു: ഓസ്ട്രേലിയയ്‌ക്കെതിരായ മൂന്നാം ഏകദിനത്തിൽ ഇന്ത്യക്ക് 7 വിക്കറ്റ് ജയം. 47.3 ഓവറിൽ മൂന്ന് വിക്കറ്റ് നഷ്ടത്തിലാണ് വിജയലക്ഷ്യമായ 287 റൺസ് ഇന്ത്യ മറികടന്നത്. സെഞ്ച്വറി നേടിയ ഓപ്പണർ രോഹിത് ശർമ്മയുടെയും അർദ്ധ സെഞ്ച്വറി നേടിയ നായകൻ വിരാട് കോഹ് ലിയുടെയും പ്രകടനമാണ് ഇന്ത്യക്ക് തകർപ്പൻ ജയം സമ്മാനിച്ചത്. അവസാന ഓവറുകളിൽ യുവതാരം ശ്രേയസ് അയ്യർ തകർത്തടിച്ചതോടെ ഇന്ത്യൻ ജയം അനായാസമായി.
ടോസ് നേടി ആദ്യം ബാറ്റ് ചെയ്ത ഓസിസ് നിശ്ചിത ഓവറിൽ 9 വിക്കറ്റ് നഷ്ടത്തിലാണ് 286 റൺസെടുത്തത്. സെഞ്ച്വറി നേടിയ സ്റ്റീവൻ സ്മിത്തിന്റെ പ്രകടനമാണ് ഓസിസിന് ഭേദപ്പെട്ട സ്കോർ സമ്മാനിച്ചത്. ഇന്ത്യക്ക് വേണ്ടി മുഹമ്മദ് ഷമി നാല് വിക്കറ്റുകൾ സ്വന്തമാക്കി.
ജയത്തോടെ മൂന്ന് മത്സരങ്ങളുടെ പരമ്പര ഇന്ത്യ 2-1ന് സ്വന്തമാക്കി.
