മെല്‍ബണ്‍: ഇന്ത്യയുടെ പുരുഷ താരം പ്രജ്‌നേഷ് ഗുണേശ്വരന്‍ ഓസ്‌ട്രേലിയന്‍ ഓപ്പണിന്റെ ആദ്യറൗണ്ടില്‍ പുറത്തായി.ടാറ്റുസുമാ ഇറ്റോ എന്ന ജപ്പാന്‍ താരത്തോടാണ് ഇന്ത്യന്‍ താരം പരാജയപ്പെട്ടത് സ്‌ക്കോര്‍: 4-6,2-6,5-7. ആദ്യ രണ്ടു സെറ്റുകളും കൈവിട്ട പ്രജ്‌നേഷ് പക്ഷെ മൂന്നാം സെറ്റില്‍ മികച്ച കളി പുറത്തെടുത്തു. ടൈബ്രേക്കറിലേക്ക് സെറ്റ് എത്തിച്ച ശേഷമാണ് പ്രജ്‌നേഷ് മുട്ടുമടക്കിയത്.
യോഗ്യതാ മത്സരത്തില്‍ തോറ്റിട്ടും തൊട്ടുമുന്നിലുണ്ടായിരുന്ന താരം പരിക്കുമൂലം പിന്മാറിയതിനെതുടര്‍ന്നാണ് പ്രജിനേഷിന് ലക്കി ലോസര്‍ എന്‍ട്രിയിലൂടെ പ്രശസ്തമായ ഗ്രാന്‍സ്ലാം ടൂര്‍ണ്ണമെന്റിലേക്ക് നറുക്കുവീണത്. ഇന്ത്യയുടെ ടോപ് റാങ്ക് താരമായ പ്രജ്‌നേഷ് നിലവില്‍ ലോക റാങ്കിംഗില്‍ 122-ാം സ്ഥാനക്കാരനാണ്. ഇതിന് മുമ്പ് നാലു തവണ ഓസ്‌ട്രേലിയന്‍ ഓപ്പണിന്റെ ഒന്നാം റൗണ്ടില്‍ കളിച്ചിട്ടുള്ള പ്രജ്‌നേഷ് കഴിഞ്ഞ വര്‍ഷം ഫ്രഞ്ച് ഓപ്പണിലും യുഎസ് ഓപ്പണിലും വിംബിള്‍ഡണിലും കളിച്ചിരുന്നു.
യോഗ്യതാ മത്സരങ്ങളില്‍ മികച്ച താരങ്ങളായ ഹാരീ ബ്രൗര്‍ഷിയറിനേയും യാന്നിക് ഹാന്‍ഫ്മാനേയും തോല്‍പ്പിച്ച ശേഷമാണ് ഗുല്‍ബിസിനോട് തോറ്റത്. എന്നാല്‍ തുടര്‍ന്ന് മൂന്ന് താരങ്ങള്‍ പരിക്കുമൂലം പിന്മാറിയതോടെ പ്രജ്‌നേഷിന് ലക്കി ലോസര്‍ പ്രവേശനം ലഭിക്കുകയായിരുന്നു.
