ഓക്ലാന്ഡ്: ഇന്ത്യ-ന്യൂസിലന്ഡ് പരമ്പരയിലെ രണ്ടാം ട്വന്റി20 നാളെ. ആദ്യ മത്സരം നടന്ന ഓക്ലന്ഡില് തന്നെയാണ് രണ്ടാം മത്സരവും നടക്കുന്നത്. ആദ്യ മത്സരത്തിലേറ്റ പരാജയത്തിന് കണക്കു പറയാന് കീവീസും വിജയത്തുടര്ച്ച തേടി ഇന്ത്യയും ഇറങ്ങുമ്പോള് ആവേശകരമായ മത്സരത്തിനാകും ഓക്ലന്ഡ് ഒരിക്കല്ക്കൂടി വേദിയാകുക. ഇന്ത്യന് സമയം ഉച്ചക്ക് 12.20നാണ് മത്സരം.
ആദ്യ മത്സരത്തില് ആതിഥേയര് ഉയര്ത്തിയ റണ്മല കീഴടക്കിയ ആത്മവിശ്വാസത്തിലാണ് ടീം ഇന്ത്യ ഇറങ്ങുന്നത്. റണ്ണൊഴുകുന്ന പിച്ചില് ന്യൂസിലന്ഡ് ബാറ്റ്സ്മാന്മാര് ഇന്ത്യന് ബൗളിംഗ് നിരയെ ശരിയ്ക്ക് പരീക്ഷിച്ചെങ്കിലും കരുത്തുറ്റ ബാറ്റിംഗ് നിരയുടെ മികവിലാണ് ഇന്ത്യ മത്സരം സ്വന്തമാക്കിയത്. ഓപ്പണര് കെ.എല് രാഹുലിന്റേയും യുവതാരം ശ്രേയസ് അയ്യരുടേയും വെടിക്കെട്ട് ബാറ്റിംഗാണ് ഇന്ത്യക്ക് തുണയായത്. മറുഭാഗത്ത് റോസ് ടെയ്ലറും കെയ്ന് വില്യംസണും കോളിന്മൻറോയും മികച്ച ഫോമിലായത് കീവീസിനും ആത്മവിശ്വാസം നല്കുന്നു.
ബാറ്റിംഗിന് അനുകൂലമായ പിച്ചായതിനാല് തന്നെ ടോസ് നേടുന്ന ടീം ബൗളിംഗ് തെരഞ്ഞെടുക്കാനാകും സാധ്യത. ആദ്യ മത്സരത്തില് കീവീസ് 200ന് മുകളില് സ്കോര് ചെയ്തിട്ടും ഒരോവര് ബാക്കി നിര്ത്തി ഇന്ത്യ വിജയലക്ഷ്യം മറികടന്നതിനാല് രണ്ടാം മത്സരത്തിലും ടോസ് നിര്ണായകമാകും. ആദ്യ മത്സരത്തില് നന്നായി റണ്സ് വിട്ടുകൊടുത്ത ശര്ദൂല് താക്കുറിനു പകരം പേസര് നവ്ദീപ് സെയ്നി ടീമില് ഇടം പിടിച്ചേക്കും.
