ന്യൂഡല്ഹി: 71ാം റിപ്പബ്ലിക് ദിനത്തില് രാജ്യത്തിന്റെ അഭിമാനം വാനോളമുയര്ത്തി സിആര്പിഎഫ് വനിതാ സൈനികര്. 18 റോയല് എന്ഫീല്ഡ് ബുള്ളറ്റ് ബൈക്കുകളില് ഒന്പത് വ്യത്യസ്ത സ്റ്റണ്ടുകളാണ് വനിതാ സൈനികര് കാഴ്ചവെച്ചത്. 65 സൈനികരാണ് അഭ്യാസപ്രകടനത്തില് പങ്കെടുത്തത്.
ഇന്സ്പെക്ടര് സീന നാഗാണ് അഭ്യാസപ്രകടനങ്ങള്ക്ക് നേതൃത്വം നല്കിയത്. ഓടിക്കൊണ്ടിരിക്കുന്ന ബൈക്കിനു മുകളില് നിന്ന് രാഷ്ട്രപതിക്ക് സല്യൂട്ട് നല്കിയാണ് സീന നാഗ് പ്രകടനങ്ങള്ക്ക് നേതൃത്വം നല്കിയത്. ഓടുന്ന ബൈക്കില് രണ്ട് 9 എംഎം പിസ്റ്റലുകളുമായി വെടിയുതിര്ക്കാന് തയ്യാറായി നില്ക്കുന്ന ഹെഡ് കോണ്സ്റ്റബിള് മീന ചൗധരിയും ശ്രദ്ധേയമായ പ്രകടനമാണ് കാഴ്ചവെച്ചത്.
കോണ്സ്റ്റബിള് സോണിയയുടെ നേതൃത്വത്തില് ഒരു ബൈക്കില് നാല് വ്യത്യസ്ത യൂണിഫോമുകളില് സഞ്ചരിക്കുന്ന സംഘവും ഇന്ത്യന് പതാകയേന്തിയ സൈനികരുടെ പ്രകടനവും ശ്രദ്ധയാകര്ഷിച്ചു. ഏറെക്കാലമായി റിപ്പബ്ലിക് ദിന പരേഡിന്റെ ഭാഗമാകാന് കാത്തിരിക്കുകയാണെന്നും അവധിയിലായിരുന്നവര്പോലും പരേഡിന്റെ ഭാഗമാകാനായി തിരിച്ചെത്തിയെന്നും ഇന്സ്പെക്ടര് സീമ നാഗ് പറഞ്ഞു.
