ലഖ്നൗ: ഫസ്റ്റ് ക്ലാസ്സ് ക്രിക്കറ്റിന്റെ ചരിത്രത്തില് ഹാട്രിക്കില് ഇന്ത്യയില് നിന്ന് ലോകനേട്ടവുമായി ഒരു താരോദയം. ഉത്തര്പ്രദേശ് നിവാസിയും രഞ്ജി ട്രോഫിയില് മധ്യപ്രദേശിനായി കളിക്കുന്ന രവിയാദവാണ് തന്റെ അരങ്ങേറ്റ മത്സരത്തിലെ ആദ്യ ഓവറില് മൂന്ന് വിക്കറ്റുകളെടുത്ത് ലോകനേട്ടം കൈവരിച്ചത്.മൂന്ന്, നാല്,അഞ്ച് പന്തുകളിലാണ് വിക്കറ്റ് വീഴ്ത്തിയത്. 1939-40 സീസണില് ദക്ഷിണാഫ്രിക്കയുടെ റിസെ ഫിലിപ്പ്സും ഇങ്ങനെ ഹാട്രിക്ക് നേടിയിരുന്നെങ്കിലും നാലു മുന് മത്സരങ്ങളില് പന്തെറിയാന് അവസരം കിട്ടിയിരുന്നില്ല എന്ന പ്രത്യേകതയുണ്ട്.
രവിയുടെ നേട്ടം സ്വന്തം സംസ്ഥാനത്തിനെതിരെ നടന്ന രഞ്ജി മത്സരത്തിനിടെയായിരുന്നു എന്നതും യാദൃശ്ചികമായി. അരങ്ങേറ്റത്തില് ഹാട്രിക്ക് നേട്ടം കൈവരിച്ച ഇന്ത്യന് താരങ്ങള് വേറെയുമുണ്ട്. എന്നാല് അതൊന്നും ആദ്യ ഓവറിലെ പന്തുകളിലായിരുന്നില്ല. ജവഗല് ശ്രീനാഥ്, സലില് അങ്കോള, അഭിമന്യൂ മിഥുന് എന്നിവരാണ് ഫസ്റ്റ് ക്ലാസ്സ് ക്രിക്കറ്റില് ഹാട്രിക്ക് നേടിയ മുന് താരങ്ങള്.
