തിരുവനന്തപുരം: വയനാട് മേപ്പാടിയിലെ കള്ളാടി തുരങ്കപാത നിർമാണ മേഖലയിലുണ്ടായ മണ്ണിടിച്ചിലിൽ അനുശോചനം രേഖപ്പെടുത്തി കേന്ദ്രമന്ത്രി സുരേഷ് ഗോപി. രാജ്യത്തിന്റെ വികസനത്തിനായി ആത്മാർഥമായി പ്രവർത്തിക്കുന്ന തൊഴിലാളികൾക്ക് ജീവൻ നഷ്ടമാകുന്ന ഇത്തരം ദുരന്തങ്ങൾ അതീവ വേദനാജനകമാണെന്ന് അദ്ദേഹം പറഞ്ഞു.
അപകടസ്ഥലത്ത് അപകടസാധ്യതയുള്ള മണ്ണ് നീക്കം ചെയ്യാൻ ജില്ലാ കളക്ടർ ഒരാഴ്ച മുമ്പ് നിർദേശം നൽകിയിരുന്നുവെന്നും അത് നടപ്പാക്കിയില്ലെന്ന റിപ്പോർട്ടുകൾ അതീവ ഗൗരവമുള്ളതാണെന്നും അദ്ദേഹം ചൂണ്ടിക്കാട്ടി. ഇക്കാര്യത്തിൽ സംസ്ഥാന സർക്കാർ സമഗ്ര അന്വേഷണം നടത്തി ആവശ്യമായ നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.
അതേസമയം, ദുരന്തത്തിന്റെ പശ്ചാത്തലത്തിൽ ആരെയും കുറ്റപ്പെടുത്തുന്നതിൽ കാര്യമില്ലെന്നും ഇത്തരം സംഭവങ്ങളിൽ നിന്ന് കൃത്യമായ പാഠങ്ങൾ ഉൾക്കൊള്ളുകയാണ് ഏറ്റവും പ്രധാനമെന്നും സുരേഷ് ഗോപി പ്രതികരിച്ചു.
അപകടവുമായി ബന്ധപ്പെട്ട വിവരങ്ങളും ദൃശ്യങ്ങളും തന്റെ ഓഫീസിൽ ലഭിച്ചതായും അവ പ്രധാനമന്ത്രിയുടെ ഓഫീസിന് കൈമാറിയിട്ടുണ്ടെന്നും സുരേഷ് ഗോപി അറിയിച്ചു. പ്രധാനമന്ത്രി വിദേശ സന്ദർശനത്തിലായിരുന്നാലും ദുരന്തത്തിന്റെ എല്ലാ വിവരങ്ങളും അദ്ദേഹത്തെ അറിയിച്ചിട്ടുണ്ടെന്നും അദ്ദേഹം പറഞ്ഞു.
ദുരന്തനിവാരണ പ്രവർത്തനങ്ങൾക്ക് കേന്ദ്രസർക്കാരിന്റെ എല്ലാ പിന്തുണയും സംസ്ഥാനത്തിന് ലഭിക്കുമെന്ന് ഉറപ്പുനൽകിയ കേന്ദ്രമന്ത്രി, ആവശ്യമായ സാങ്കേതിക സഹായമോ വിദഗ്ധ സേവനമോ ആവശ്യമായി വന്നാൽ അത് അടിയന്തരമായി ലഭ്യമാക്കാൻ കേന്ദ്രം സന്നദ്ധമാണെന്നും വ്യക്തമാക്കി.
നിലവിൽ സ്ഥിതിഗതികൾ സംസ്ഥാന സർക്കാരിന്റെ നിയന്ത്രണത്തിലാണെന്നും രക്ഷാപ്രവർത്തനങ്ങൾക്ക് ആവശ്യമായ എല്ലാ പിന്തുണയും കേന്ദ്രം തുടർന്നും നൽകുമെന്നും സുരേഷ് ഗോപി കൂട്ടിച്ചേർത്തു.
