ന്യൂഡല്ഹി: ട്രെയിനില് മോശമായി പെരുമാറിയാല് ഇനി പണികിട്ടും. വിമാന കമ്പനികളെ പോലെ മോശമായി പെരുമാറുന്ന യാത്രക്കാര്ക്ക് വിലക്ക് ഏര്പ്പെടുത്താനൊരുങ്ങി റെയില്വേ. മറ്റ് യാത്രക്കാര്ക്ക് ഭീഷണിയാകുന്ന യാത്രക്കാരെ നിശ്ചിത കാലത്തേക്ക് വിലക്കാനാണ് റെയില്വേ പദ്ധതിയിടുന്നത്.
ആറ് മാസം വരെയാണ് യാത്രക്കാര്ക്ക് വിലക്കേര്പ്പെടുത്തുക. യാത്രക്കാര്ക്കിടയില് മോശമായി പെരുമാറുന്നവരുടെ എണ്ണം വര്ധിച്ചു വരുന്ന സാഹചര്യത്തിലാണ് പുതിയ തീരുമാനം എടുത്തത്.
മോശമായി പെരുമാറുന്ന യാത്രക്കാരന് നിശ്ചിത കാലം വരെ ട്രെയിനില് കയറാന് അനുവദിക്കാത്തവിധം നിരോധനം ഏര്പ്പെടുത്താനാണ് പദ്ധതിയിടുന്നത്. വിമാനത്തില് യാത്ര ചെയ്യുന്നതിന് വിലക്ക് നേരിടുന്ന യാത്രക്കാരന് ട്രെയിനിലും യാത്ര ചെയ്യാന് കഴിയാത്തവിധമുള്ള സംവിധാനമാണ് ഇതിനായി ഒരുക്കാന് പോകുന്നത്.
വിമാന കമ്പനികളില് നിന്നും മോശം പെരുമാറ്റത്തിന്റെ പേരില് വിലക്ക് നേരിടുന്ന യാത്രക്കാരുടെ വിവരങ്ങള് ശേഖരിച്ച് റെയില്വേയുടെ സിസ്റ്റത്തില് ചേര്ക്കാനാണ് തീരുമാനം.
