ചൈനയില്‍ പൊട്ടിപ്പുറപ്പെട്ട നൊവല്‍ കൊറോണ വൈറസ് വ്യാപനം അന്താരാഷ്‌ട്രതലത്തില്‍ മറ്റ് രാജ്യങ്ങളിലും റിപ്പോര്‍ട്ട് ചെയ്തിട്ടുണ്ട്. കൊറോണ വൈറസ് സാധാരണ ജലദോഷം മുതല്‍ ഗുരുതര രോഗങ്ങളായ മിഡില്‍ ഈസ്റ്റ് റെസ്പിറേറ്ററി സിന്‍ഡ്രോം (എം.ഇ.ആര്‍.എസ്)- സി.ഒ.വി, സിവിയര്‍ അക്യൂട്ട് റെസ്പിറേറ്ററി സിന്‍ഡ്രോം (സാര്‍സ്-സി.ഒ.വി) എന്നിവയ്‌ക്കു വരെ കാരണമാകും.
എന്താണ് രോഗ ലക്ഷണങ്ങള്‍?
പനി, ചുമ, ശ്വസിക്കുന്നതിനുള്ള ബുദ്ധിമുട്ട് എന്നിവ പൊതുവായ രോഗ ലക്ഷണങ്ങളാണ്.
രോഗബാധിതനാകുന്നതില്‍ നിന്ന് എങ്ങനെ സ്വയം സംരക്ഷിക്കാം?
ഈ അടുത്ത കാലത്ത് ചൈനയിലേക്ക് യാത്ര ചെയ്തിട്ടുണ്ടെങ്കിലോ (14 ദിവസത്തിനുള്ളില്‍), നൊവല്‍ കോറോണ വൈറസ് ബാധിതനുമായി എന്തെങ്കിലും സമ്പര്‍ക്കമുണ്ടായിട്ടുണ്ടെങ്കിലോ, താഴെപ്പറയുന്ന നിര്‍ദ്ദേശങ്ങള്‍ പിന്തുടരുക:
· തിരിച്ചെത്തി 14 ദിവസം വീട്ടില്‍തന്നെ പ്രത്യേകം മാറിത്താമസിക്കുക.
ഒറ്റക്ക് ഒരു മുറിയില്‍ താമസിക്കുക
മറ്റു കുടുംബാംഗങ്ങളുമായുള്ള സമ്പര്‍ക്കം നിയന്ത്രിക്കുക, സന്ദര്‍ശകരെ ഒഴിവാക്കുക
· ചുമയ്‌ക്കുമ്പോളും തുമ്മുമ്പോഴും മൂക്കും വായും പൊത്തുക.
· ജലദോഷം, ഫ്‌ളൂ ലക്ഷണങ്ങളുള്ളവരുമായി അടുത്തു പെരുമാറുന്നത് ഒഴിവാക്കുക. (കുറഞ്ഞത് 1 മീറ്ററെങ്കിലും അകലം പാലിക്കണം)
കൈകള്‍ വൃത്തിയായി സൂക്ഷിക്കേണ്ടത് വളരെ പ്രധാനമാണ്. താഴെപ്പറയുന്ന സാഹചര്യങ്ങളില്‍ കൈ വൃത്തിയായി കഴുകേണ്ടതാണ്
· തുമ്മുകയോ ചുമയ്‌ക്കുകയോ ചെയ്തതിനു ശേഷം
· രോഗബാധിതരെ പരിചരിക്കുമ്പോള്‍
· ഭക്ഷണം ഉണ്ടാക്കുമ്പോഴും അതിന് മുമ്പും ശേഷവും
· ഭക്ഷണം കഴിക്കുന്നതിനുമുമ്പ്
· ശുചിമുറി ഉപയോഗിച്ച ശേഷം
· കൈ അഴുക്കായാല്‍
· മൃഗങ്ങളെയോ, മൃഗങ്ങളുടെ മാലിന്യങ്ങളോ കൈകാര്യം ചെയ്താല്‍
ചൈനയില്‍ നിന്ന് തിരിച്ചെത്തി 28 ദിവസങ്ങള്‍ക്കുള്ളില്‍ പനി, ചുമ, ശ്വസിക്കാന്‍ ബുദ്ധിമുട്ട് എന്നിവ അനുഭവപ്പെട്ടാല്‍:
· കേന്ദ്ര ഗവണ്‍മെന്റിന്റെ ആരോഗ്യ മന്ത്രാലയം കണ്‍ട്രോള്‍ റൂം നമ്പറായ 91-11-23978046 നമ്പറില്‍ വിളിച്ച് കൂടുതല്‍ വിവരങ്ങള്‍ അറിയുക
· ഉടന്‍ തന്നെ ഒരു മാസ്‌ക് ധരിച്ച്, നിര്‍ദ്ദേശിച്ചിട്ടുള്ള ഏറ്റവും അടുത്തുള്ള ആരോഗ്യകേന്ദ്രത്തിലെത്തുക.
പരിഭ്രാന്തരാകരുത്.
