ന്യൂഡല്ഹി: വാഹന പ്രേമികള് ഏറെ ആകാംക്ഷയോടെ കാത്തിരുന്ന കിയ കാര്ണിവല് ലോഞ്ച് ചെയ്തു. ഡല്ഹിയില് നടക്കുന്ന ഓട്ടോ എക്സ്പോയിലാണ് വാഹനം ഔദ്യോഗികമായി അവതരിപ്പിച്ചത്. ആഡംബര എംപിവി വിഭാഗത്തിലാണ് കാര്ണിവല് ഉള്പ്പെടുത്തിയിരിക്കുന്നത്.
ഇന്നോവ ക്രിസ്റ്റയാണ് പ്രധാന എതിരാളിയെങ്കിലും വലിപ്പത്തിലും ഫീച്ചറുകളിലും ക്രിസ്റ്റയെക്കാള് ഒരുപടി മുന്നിലാണ് കാര്ണിവല്. 5115 mm നീളവും 1985 mm വീതിയും 1740 mm ഉയരവും 3060 mm വീല്ബേസുമാണ് കാര്ണിവലിനുള്ളത്. ബിഎസ് VI നിലവാരത്തിലുള്ള 2.2 ലിറ്റര് ടര്ബോ ചാര്ജ്ഡ് ഡീസല് എന്ജിനായിരിക്കും വാഹനത്തിനുള്ളത്.
രണ്ടാം നിരയില് വശങ്ങളിലേക്ക് തുറക്കുന്ന സ്ലൈഡിംഗ് ഡോറുകളാണ് ഘടിപ്പിച്ചിരിക്കുന്നത്. ഇത് വാഹനത്തിന് കൂടുതല് ആഡംബരം നല്കുന്നുണ്ട്. എട്ട് എയര്ബാഗുകള്, എബിഎസ്, ഇഎസ്സി, ഹില്സ്റ്റാര്ട്ട് അസിസ്റ്റ് കണ്ട്രോള്, റിവേഴ്സ് പാര്ക്കിങ് സെന്സറുകള്, ഫ്രണ്ട് പാര്ക്കിംഗ് സെന്സറുകള്, പ്രൊജക്ഷന് ഹെഡ്ലാമ്പ്, ഡിആര്എല്, ഫോഗ് ലാമ്പ്, 19 ഇഞ്ച് ഡയ്മണ്ട് കട്ട് അലോയി വീല്, എല്ഇഡി ടെയില് ലാമ്പ്, സ്കിഡ് പ്ലേറ്റ് എന്നിവയും കാര്ണിവലിന്റെ സവിശേഷതകളാണ്.
പ്രീമിയം മോഡലുകളില് 7 സീറ്ററിന് 24.95 ലക്ഷം രൂപയും 8 സീറ്ററിന് 25.15 ലക്ഷം രൂപയുമാണ് വാഹനത്തിന്റെ വില. പ്രസ്റ്റീജ് മോഡലുകളില് 7 സീറ്ററിന് 28.95 ലക്ഷം രൂപയും 9 സീറ്ററിന് 29.95 ലക്ഷം രൂപയുമാണ് ഡല്ഹി എക്സ് ഷോറൂമിലെ വിലയെന്നാണ് കമ്പനി നല്കുന്ന വിവരം. ലിമോസിന് 7 സീറ്റര് മോഡലിന് 33.95 ലക്ഷം രൂപ വില വരുമെന്നും കമ്പനി അറിയിച്ചു.