ന്യൂഡൽഹി: തങ്ങളുടെ ജനപ്രിയ 7 സീറ്ററായ ഹെക്സയുടെ സഫാരി എഡിഷനെ അവതരിപ്പിച്ച് റ്റാറ്റ. ഡൽഹി ഓട്ടോ എക്സ്പോയിലാണ് റ്റാറ്റ തങ്ങളുടെ പുതിയ മോഡലിനെ അവതരിപ്പിച്ചിരിക്കുന്നത്. 4X4 നെ അടിസ്ഥാനമാക്കി ചെറിയ ചില പരിഷ്കാരങ്ങളോടെ മുഖം മിനുക്കിയാണ് പുതിയ ഹെക്സ എത്തുന്നത്. ബിഎസ് 6 അടിസ്ഥാനമാക്കിയാണ് വാഹനം നിർമ്മിച്ചിരിക്കുന്നത്.
കാഴ്ച്ചയിൽ നിലവിലെ മോഡലിന് സമാനമാണെങ്കിലും ശ്രദ്ധേയമായ ചില മാറ്റങ്ങൾ റ്റാറ്റ വാഹനത്തിൽ നൽകിയിട്ടുണ്ട്. ഇതിൽ പ്രധാനപ്പെട്ടത് നിലവിലെ മോഡലിൽ ഉൾപ്പെടുത്തിയിരുന്ന ക്രോം ആവരണങ്ങളെല്ലാം കറുത്ത നിറത്തിലുള്ളതാക്കി മാറ്റിയിരിക്കുന്നുവെന്നതാണ്. ഇത് വാഹനത്തിന് കൂടുതൽ സ്പോർട്ടി ലുക്ക് നൽകുന്നുണ്ട്.
കടുപ്പമേറിയ ബമ്പറുകൾ, കറുത്ത നിറത്തിൽ പൂർത്തിയാക്കിയിരിക്കുന്ന 17 ഇഞ്ച് അലോയ് വീലുകൾ, പിന്നിൽ സഫാരി എഡിഷൻ ബാഡ്ജിംഗ് എന്നിവയാണ് വാഹനത്തിന്റെ പുറംമോടിയിലുള്ള പ്രധാനമാറ്റങ്ങൾ. വാഹനത്തിനുള്ളിൽ റ്റാറ്റ കാര്യമായ മാറ്റങ്ങളൊന്നും വരുത്തിയിട്ടില്ല. പുതിയ ബ്ലാക്ക്-ബീജ് കളർ സ്കീം മാത്രമാണ് മാറ്റമായി ചൂണ്ടി കാണിക്കാൻ സാധിക്കുന്നത്. ഒപ്പം ഡാഷ് ബോർഡിൽ സഫാരി എഡിഷൻ എന്ന ബാഡ്ജിംഗും കമ്പനി നൽകിയിട്ടുണ്ട്.
ആറ് സ്പീഡ് മാനുവൽ ഗിയർബോക്സുള്ള പുതിയ ഹെക്സയുടെ ഓൾ-വീൽ ഡ്രൈവ് ഓപ്ഷനും ആറ് സ്പീഡ് മാനുവൽ, ഓട്ടോമാറ്റിക് ഗിയർബോക്സും റിയർ വീൽ ഡ്രൈവുള്ള സ്റ്റാൻഡേർഡ് മോഡലും ലഭ്യമാകും. അതേസമയം, വാഹനം എപ്പോൾ വിപണിയിലെത്തുമെന്നോ വാഹനത്തിന്റെ വില സംബന്ധിച്ചോ കൂടുതൽ വിവരങ്ങളൊന്നും കമ്പനി പുറത്തുവിട്ടിട്ടില്ല.