ജൊഹന്നാസ്ബര്ഗ്ഗ്: അണ്ടര്-19 ലോകകപ്പ് ക്രിക്കറ്റിന്റെ ഫൈനല് ഇന്ന്. ഏഷ്യന് ക്രിക്കറ്റ് ശക്തികളായ ഇന്ത്യയും ബംഗ്ലാദേശുമാണ് കിരീടപോരാട്ടത്തിനായി ഇന്നിറങ്ങുന്നത്. നിലവിലെ ചാമ്പ്യന്മാരായ ഇന്ത്യയും ആദ്യമായി ഫൈനലിലെത്തിയ ബംഗ്ലാദേശുമാണ് ദക്ഷിണാഫ്രിക്കന് മണ്ണില് ഏറ്റുമുട്ടുന്നത്. ഇന്നുച്ചക്കാണ് മത്സരം.
സെമിയില് ബദ്ധവൈരികളായ പാകിസ്താനെ തീര്ത്തും നിഷ്പ്രഭമാക്കി 10 വിക്കറ്റിന്റെ തകര്പ്പന് വിജയം നേടിയാണ് ടീം ഇന്ത്യ ഫൈനലിലേക്ക് കുതിച്ചത്. വെറും 172 റണ്സിന് പാകിസ്താനെ പുറത്താക്കിയ ഇന്ത്യന് നിര വിക്കറ്റൊന്നും കളയാതെ 35.2 ഓവറില് 176 റണ്സ് നേടിയാണ് ഫൈനലിലേക്ക് എത്തിയത്. ഗംഭീര ഫോമില് തുടരുന്ന യശസ്വി ജയ്സ്വാളിന്റെ സെഞ്ച്വറി(105)യുടേയും ഓപ്പണര് ദിവ്യാന്ശ് സക്സേനയുടെ 59 റണ്സും പാകിസ്താനെ തകര്ത്തെറിഞ്ഞു. ബൗളിങ്ങില് കാര്ത്തിക് ത്യാഗിയും രവി ബിഷ്ണോയിയും അടങ്ങുന്ന നിര ലോകനിലവാരമുള്ള ബൗളിംഗ് പ്രകടനമാണ് കാഴ്ചവക്കുന്നത്.
അഞ്ചാം കിരീടമാണ് ഇന്ത്യ ലക്ഷ്യമിടുന്നത്. കരുത്തരായ ന്യൂസിലാന്റിനെ 6 വിക്കറ്റിന് തോല്പ്പിച്ചാണ് ബംഗ്ലാദേശ് ആദ്യമായി ലോകകപ്പ് ഫൈനലിലെത്തുന്നത്. മധ്യനിരയില് മുഹമ്മദുള് ഹസന് ജോയിയും ഓപ്പണറായ പര്വേസ് എമണും, താന്സിദ് ഹസനുമാണ് ബാറ്റിംഗില് ബംഗ്ലാദേശിന്റെ കരുത്ത്. ബൗളിംഗില് ഷോറിഫുള് ഇസ്ലാം, ഹസന് മുറാദ് എന്നിവരും ലോകകപ്പില് മികച്ച പ്രകടനമാണ് നടത്തിയിരിക്കുന്നത്.
