ന്യൂഡല്‍ഹി: ക്രിക്കറ്റ് ലോകത്തെ വീണ്ടും അമ്പരപ്പിച്ച് മുന്‍ ഇന്ത്യന്‍ ക്രിക്കറ്റ് ഇതിഹാസം രാഹുല്‍ ദ്രാവിഡിന്റെ മകന്‍ സമിത്. മല്യ അതിഥി ഇന്റര്‍നാഷണല്‍ സ്‌കൂളും ശ്രീ കുമാരനും തമ്മില്‍ നടന്ന അണ്ടര്‍ 14 ക്രിക്കറ്റ് മത്സരത്തിലാണ് അച്ഛനേപ്പോലെ തന്നെ മകനും വന്‍മതിലായി മാറിയത്. ഇതോടെ രണ്ട് മാസത്തിനിടെ സമിത് നേടുന്ന രണ്ടാമത്തെ ഇരട്ട സെഞ്ച്വറിയാണിത്.
മല്യ അതിഥി സ്‌കൂളിനു വേണ്ടി 33 ബൗണ്ടറികളുടെ അകമ്പടിയോടെ 204 റണ്‍സാണ് സമിത് അടിച്ചു കൂട്ടിയത്. സമിതിന്റെ മികച്ച പ്രകടനത്തിന്റെ ബലത്തില്‍ മല്യ അതിഥി സ്‌കൂള്‍ 3 വിക്കറ്റ് നഷ്ടത്തില്‍ 377 റണ്‍സ് നേടി. മറുപടി ബാറ്റിംഗില്‍ ശ്രീ കുമാരന്റെ ഇന്നിംഗ്‌സ് 110 റണ്‍സില്‍ അവസാനിച്ചു. ബാറ്റും ബോളും തനിക്ക് ഒരുപോലെ വഴങ്ങുമെന്ന് തെളിയിച്ച സമിത് മത്സരത്തില്‍ രണ്ട് വിക്കറ്റും സ്വന്തമാക്കി.
നേരത്തെ, കഴിഞ്ഞ വര്‍ഷം ഡിസംബറില്‍ ധര്‍വാദ് സോണിനെതിരേ വൈസ് പ്രസിഡന്റ്‌സ് ഇലവനുവേണ്ടിയാണ് സമിത് ഇരട്ട സെഞ്ച്വറി നേടിയത്. ഡല്‍ഹിയില്‍ നടന്ന അണ്ടര്‍ 14 ഇന്റര്‍ സോണല്‍ ടൂര്‍ണമെന്റിലായിരുന്നു സമിത്തിന്റെ തകര്‍പ്പന്‍ പ്രകടനം. 256 പന്തില്‍ നിന്ന് 22 ബൗണ്ടറികളുടെ അകമ്പടിയോടെ 201 റണ്‍സാണ് സമിത് അന്ന് സ്വന്തമാക്കിയത്.
