ബ്രസീലിനെതിരെ നേടിയ ഇരട്ടഗോളിലൂടെ നോര്‍വേയെ ലോകകപ്പിന്റെ ക്വാര്‍ട്ടര്‍ ഫൈനലിലെത്തിച്ച എര്‍ലിങ് ഹാളണ്ട് വ്യക്തിഗത നേട്ടത്തിലും ചരിത്രം കുറിച്ചു. നാല് ലോകകപ്പ് മത്സരങ്ങളില്‍ നിന്ന് ഏഴ് ഗോളുകള്‍ നേടിയ ഹാളണ്ട് ഗോള്‍ഡന്‍ ബൂട്ട് പട്ടികയില്‍ ലയണല്‍ മെസിക്കും കിലിയന്‍ എംബാപ്പെയ്‌ക്കുമൊപ്പം ഒന്നാം സ്ഥാനത്തെത്തി.
എന്നാല്‍ മെസിക്കും എംബാപ്പെയ്‌ക്കും ഇല്ലാത്ത ഒരു അപൂര്‍വ റെക്കോര്‍ഡും ഹാളണ്ടിന്റെ പേരിലായി. കന്നി ലോകകപ്പിലെ ആദ്യ നാല് മത്സരങ്ങളില്‍ ഏഴ് ഗോള്‍ നേടുന്ന ആദ്യ താരം എന്ന നേട്ടമാണ് നോര്‍വീജിയന്‍ സ്ട്രൈക്കര്‍ സ്വന്തമാക്കിയത്. 1970 ലോകകപ്പില്‍ ആദ്യ നാല് മത്സരങ്ങളില്‍ എട്ട് ഗോള്‍ നേടിയ ജര്‍മ്മന്‍ ഇതിഹാസം ഗെര്‍ഡ് മുള്ളറിന് ശേഷം ഈ നേട്ടം കൈവരിക്കുന്ന ആദ്യ താരമാണ് ഹാളണ്ട്.
അതോടൊപ്പം ഒരു ലോകകപ്പില്‍ നാല് വിജയഗോളുകള്‍ നേടുന്ന താരങ്ങളുടെ പട്ടികയിലും ഹാളണ്ട് ഇടംപിടിച്ചു. 1970-ല്‍ ഗെര്‍ഡ് മുള്ളറും പിന്നീട് 1974-ല്‍ ഗ്രെഗോര്‍സ് ലാറ്റോയും 1990-ല്‍ സാല്‍വത്തോറെ സ്‌കില്ലാച്ചിയും ഈ നേട്ടം കൈവരിച്ചിരുന്നു. ബ്രസീലിനെതിരായ പ്രീക്വാര്‍ട്ടര്‍ പോരാട്ടത്തില്‍ 79-ാം മിനിറ്റിലും 90-ാം മിനിറ്റിലുമാണ് ഹാളണ്ട് വലകുലുക്കിയത്.
ഈ വിജയത്തോടെ 1998ന് ശേഷം ആദ്യമായി ലോകകപ്പ് കളിക്കുന്ന നോര്‍വേ ചരിത്രത്തിലാദ്യമായി ക്വാര്‍ട്ടര്‍ ഫൈനലിലേക്കും മുന്നേറി. മത്സരശേഷം പ്രതികരിച്ച ഹാളണ്ട്, ‘ബ്രസീലിനെതിരായ ഈ വിജയം നോര്‍വേ ഫുട്‌ബോള്‍ ചരിത്രത്തിലെ ഏറ്റവും വലിയ വിജയങ്ങളിലൊന്നായി എന്നും ഓര്‍മിക്കപ്പെടും. ഈ നേട്ടത്തിന്റെ ഭാഗമാകാന്‍ കഴിഞ്ഞതില്‍ അഭിമാനമുണ്ട്,’ എന്ന് പറഞ്ഞു.
ക്വാര്‍ട്ടര്‍ ഫൈനല്‍ മത്സരങ്ങള്‍ ആരംഭിക്കാനിരിക്കെ ഗോള്‍ഡന്‍ ബൂട്ട് പോരാട്ടം കൂടുതല്‍ ആവേശകരമായിരിക്കുകയാണ്. ഏഴ് ഗോളുകളുമായി മെസി, എംബാപ്പെ, ഹാളണ്ട് എന്നിവര്‍ ഒപ്പത്തിനൊപ്പമെത്തിയ സാഹചര്യത്തില്‍, ലോകകപ്പിലെ മികച്ച ഗോള്‍വേട്ടക്കാരന്‍ ആരാകുമെന്ന ആകാംക്ഷയാണ് ഇനി ആരാധകര്‍ പങ്കിടുന്നത്.
