മാഡ്രിഡ്: യുവേഫ ചാമ്പ്യന്‍സ് ലീഗിലെ നോക്കൗട്ട് മത്സരങ്ങള്‍ക്ക് ഇന്ന് തുടക്കം. ഇന്ന് നടക്കാനിരിക്കുന്ന ആവേശകരമായ മത്സരത്തില്‍ ഫ്രഞ്ച് കരുത്തന്‍മാരായ പിഎസ്ജിയും ജര്‍മന്‍ ടീമായ ബൊറൂസിയ ഡോര്‍ട്മുണ്ടും ഏറ്റുമുട്ടും.
ഡോര്‍ട്മുണ്ടിനെതിരെ കരുത്തരായ നിരയെത്തന്നെയാണ് പിഎസ്ജി കളത്തിലിറക്കുക. സൂപ്പര്‍ താരം നെയ്മര്‍ ഇന്ന് കളിച്ചേക്കില്ലെന്നാണ് റിപ്പോര്‍ട്ട്. യുവതാരം കീലിയന്‍ എംബാപ്പെയാകും ബൊറൂസിയക്ക് തലവേദനയാകുക. മൗറോ ഇക്കാര്‍ഡിയും എയ്ഞ്ചല്‍ ഡി മരിയയും അടങ്ങുന്ന പിഎസ്ജിക്കാണ് ജയസാധ്യത.
അതിവേഗ ഫുട്‌ബോള്‍ കളിക്കുന്ന ബൊറൂസിയ ഏത് ടീമിനും വെല്ലുവിളി ഉയര്‍ത്താന്‍ കെല്‍പ്പുള്ളവരാണ്. സ്വന്തം മൈതാനത്ത് കളിക്കുന്നതിന്റെ ആനുകൂല്യവും ബൊറൂസിയക്ക് ലഭിക്കും.
മറ്റൊരു മത്സരത്തില്‍ നിലവിലെ ചാമ്പ്യന്‍മാരായ ലിവര്‍പൂള്‍ അത്‌ലറ്റിക്കോ മാഡ്രിഡിനെ നേരിടും. ലിവര്‍പൂളിന്റെ ആക്രമണവും അത്ലറ്റിക്കോയുടെ പ്രതിരോധവും തമ്മിലുള്ള പോരാട്ടമാകും ഇന്ന് നടക്കുക. ഇന്ത്യന്‍ സമയം രാത്രി 1.30നാണ് മത്സരങ്ങള്‍ ആരംഭിക്കുക.
