വെല്ലിംഗ്ടണ്‍: ക്രിക്കറ്റിലെ തന്റെ ഭാവി കാര്യങ്ങള്‍ വ്യക്തമാക്കി ഇന്ത്യന്‍ നായകന്‍ വിരാട് കോഹ്‌ലി. അടുത്ത മൂന്ന് വര്‍ഷം കൂടി ക്രിക്കറ്റിന്റെ മൂന്ന് ഫോര്‍മാറ്റുകളിലും കളിക്കുമെന്ന് അദ്ദേഹം വ്യക്തമാക്കി. നിലവില്‍ അമിത ജോലിഭാരമുണ്ടെന്നും ഇതിനൊപ്പം കായിക ക്ഷമതയും നിലനിര്‍ത്തേണ്ടതുണ്ടെന്നും കോഹ്‌ലി പറഞ്ഞു. 2021ല്‍ ഇന്ത്യയില്‍ നടക്കാനിരിക്കുന്ന ട്വന്റി20 ലോകകപ്പിന് ശേഷം ഏതെങ്കിലും ഒരു ഫോര്‍മാറ്റില്‍ നിന്നും പിന്‍മാറുമോ എന്ന ചോദ്യത്തിനുള്ള മറുപടിയായാണ് കോഹ്‌ലി ഇക്കാര്യം വ്യക്തമാക്കിയത്.
ഇപ്പോള്‍ മുതലുള്ള മൂന്ന് വര്‍ഷത്തേക്ക് ഞാന്‍ എന്നെത്തന്നെ തയ്യാറാക്കുകയാണ്. വലിയ ചിത്രമാണ് മനസിലുള്ളത്. എന്നാല്‍ മൂന്ന് വര്‍ഷത്തിനു ശേഷം ഇക്കാര്യത്തില്‍ ഒരു തീരുമാനമെടുക്കും. ഏകദേശം എട്ട് വര്‍ഷത്തോളമായി ഞാന്‍ കളിക്കുന്നു. വര്‍ഷത്തില്‍ 300 ദിവസവും മത്സരങ്ങളും യാത്രകളും പരിശീലനവും മാത്രമാണ്. എന്നാല്‍ ഇവയിലൊന്നുമുള്ള തീവ്രത ഇതുവരെ നഷ്ടപ്പെട്ടിട്ടില്ല. എല്ലാ ഫോര്‍മാറ്റുകളിലും കളിക്കുന്നവര്‍ക്ക് ഇടവേള എടുക്കുക എപ്പോഴും സാദ്ധ്യമായ കാര്യമല്ലെന്നും കോഹ്‌ലി കൂട്ടിച്ചേര്‍ത്തു.
തനിക്ക് 34, 35 വയസാകുമ്പോള്‍ ശാരീരിക ക്ഷമതയുടെ കാര്യം മനസിലാക്കാന്‍ സാധിക്കും. എന്നാല്‍ വരാനിരിക്കുന്ന മൂന്ന് വര്‍ഷങ്ങള്‍ തനിക്ക് വലിയ പ്രതീക്ഷ നല്‍കുന്നുണ്ടെന്നും അദ്ദേഹം വ്യക്തമാക്കി. ഇന്ത്യയില്‍ നടക്കാനിരിക്കുന്ന ട്വന്റി20 ലോകകപ്പിലും 2023ല്‍ നടക്കാനിരിക്കുന്ന ഏകദിന ലോകകപ്പിലും ടീം ഇന്ത്യക്ക് തന്റെ മികച്ച ഫോം അത്യന്താപേക്ഷിതമാണെന്ന് മനസിലാക്കിയുള്ള പ്രതികരണമാണ് ഇന്ത്യന്‍ നായകന്റെ ഭാഗത്തു നിന്നും ഉണ്ടായിരിക്കുന്നത്.
