മാഡ്രിഡ്: ചാമ്പ്യന്‍സ് ലീഗിന്റെ നോക്കൗട്ട് മത്സരത്തില്‍ കരുത്തരായ ടോട്ടന്നം ഹോട്‌സ്പറിനെ അട്ടിമറിച്ച് ആര്‍ബി ലെയ്പ്‌സിഗ്. എതിരില്ലാത്ത ഒരു ഗോളിനായിരുന്നു ലെയ്പ്‌സിഗിന്റെ ജയം. 58ാം മിനിട്ടില്‍ ടിമോ വെര്‍നര്‍ നേടിയ പെനാല്‍ട്ടി ഗോളാണ് ലെയ്പ്‌സിഗിന്റെ വിജയത്തില്‍ നിര്‍ണായകമായത്. മറ്റൊരു മത്സരത്തില്‍ വലന്‍സിയയെ ഒന്നിനെതിരെ നാല് ഗോളുകള്‍ക്ക് അറ്റ്‌ലാന്റ പരാജയപ്പെടുത്തി.
തികച്ചും ആവേശകരമായ പോരാട്ടത്തിനാണ് നോക്കൗട്ട് മത്സരങ്ങള്‍ വേദിയായത്. തുടക്കം മുതല്‍ മത്സരത്തില്‍ നിറഞ്ഞു നിന്ന ലെയ്പ്‌സിഗ് ബുണ്ടന്‍സ്‌ലിഗയില്‍ രണ്ടാം സ്ഥാനക്കാരാണ്. മത്സരത്തിന്റെ ആദ്യ പകുതിയില്‍ ലെയ്പ്‌സിഗ് തന്നെയാണ് കള്ി നിയന്ത്രിച്ചത്. രണ്ടാം പകുതിയില്‍ 23കാരനായ വെര്‍നറാണ് ലെയ്പ്‌സിഗിന്റെ വിജയ ഗോള്‍ നേടിയത്. വെര്‍നര്‍ മത്സരത്തിലുടനീളം നിറഞ്ഞുനിന്നു. എവേ ഗോള്‍ നേടിയതിന്റെ ആനുകൂല്യവുമായാകും ലെയ്പ്‌സിഗ് അടുത്ത മത്സരത്തിനിറങ്ങുക.
മറ്റൊരു മത്സരത്തില്‍ അറ്റ്‌ലാന്റ വലന്‍സിയയെ മുട്ടുകുത്തിച്ചു. ആദ്യ പകുതിയില്‍ രണ്ട് ഗോളുകള്‍ നേടിയ അറ്റ്‌ലാന്റ രണ്ടാം പകുതിയിലും ഗോളടി തുടര്‍ന്നു. ഹാറ്റെബോയറിന്റെ ഇരട്ട ഗോളുകളാണ് അറ്റ്‌ലാന്റയുടെ വിജയം അനായാസമാക്കിയത്. ഇലിസിച്, ഫ്രൂളെര്‍ എന്നിവരും ഗോളുകള്‍ നേടി. 68ാം മിനിട്ടില്‍ ചെറിഷേവാണ് വലന്‍സിയയുടെ ആശ്വാസ ഗോള്‍ നേടിയത്.
