വെല്ലിംഗ്ടണ്‍: ബാറ്റിംഗില്‍ ഇന്ത്യയുടെ നട്ടെല്ലാകേണ്ട നായകന്‍ വിരാട് കോഹ്‌ലിയുടെ ബാറ്റിംഗ് വീഴ്ചകള്‍ 2020ല്‍ തുടര്‍ക്കഥയാകുന്നു. ആദ്യ ടെസ്റ്റില്‍ വെറും 2 റണ്‍സിനാണ് വിരാട് വീണ്ടും വീണിരിക്കുന്നത്. നടന്നുവരുന്ന ന്യൂസിലാന്റിലെ പരമ്പരകളിലെ ഒരു കളികളിലും വിരാട് ബാറ്റിംഗില്‍ ശോഭിച്ചില്ല. ടി20 പരമ്പര സ്വന്തമാക്കിയെങ്കിലും ഏകദിന പരമ്പര കൈവിട്ടതിന്റെ മുഖ്യകാരണക്കാരന്‍ കോഹ്‌ലിയാണെന്ന് കളിവിദ്ഗ്ധര്‍ ചൂണ്ടിക്കാട്ടുന്നു.
2019 നവംബറില്‍ ബംഗ്ലാദേശിനെതിരെ നേടിയ 139 റണ്‍സാണ് അവസാനമായി വിരാടിന്റെ മികച്ച സ്‌ക്കോര്‍. തുടര്‍ന്ന് കളിച്ച 19 കളികളിലൊന്നിലും മൂന്നക്കം കടക്കാനാടിട്ടില്ല. ആകെ 3 തവണയാണ് 50 റണ്‍സ് കടന്നത്. ഒപ്പം ന്യൂസിലാന്റിലെത്തിയ ശേഷം മൂന്നുഫോര്‍മാറ്റിലും വിരാട് ആകെ നേടിയത് ഒരു അര്‍ദ്ധ സെഞ്ച്വറി മാത്രമാണ്. 2014ലാണ് ഇതിന് മുമ്പ് കോഹ്‌ലിക്ക് ഇതുപോലെ ബാറ്റിംഗില്‍ പരാജയം നേരിടേണ്ടിവന്നത്. 2011ലും ഇതുപോലെ നിരന്തരം ഫോം കിട്ടാതെ വന്നിട്ടുണ്ട്. ആ വര്‍ഷം ഫെബ്രുവരി മുതല്‍ സെപ്റ്റംബര്‍ വരെ 24 കളികളിലായി ആകെ നേടിയത് ഒരു സെഞ്ച്വറി മാത്രമായിരുന്നു.
