ആഡംബര എംപിവി ശ്രേണിയിലേക്ക് വാഹന നിർമ്മാതാക്കൾ ശ്രദ്ധ കേന്ദ്രീകരിക്കാനൊരുങ്ങുകയാണെന്ന വാർത്തകൾക്ക് പിന്നാലെയായിരുന്നു കിയ തങ്ങളുടെ എംപിവിയായ കാർണിവൽ പുറത്തിറക്കിയത്. ഇപ്പോഴിതാ ജനപ്രിയ വാഹന നിർമ്മാതാക്കളായ ടൊയോട്ടയും ആഡംബര വാഹനം പുറത്തിറക്കാനൊരുങ്ങുകയാണ്. പുറത്തുവരുന്ന റിപ്പോർട്ടുകൾ പ്രകാരം വാഹനം ഈ മാസം 26 ന് അവതരിപ്പിക്കാനാണ് കമ്പനി ഒരുങ്ങുന്നത്.
‘സസ്റ്റൈനബിൾ ലക്ഷ്വറി’ എന്ന വിശേഷണവുമായാണ് വാഹനം വിപണിയിലേക്ക് എത്തുന്നത്. വാഹനത്തിന്റെ ഒദ്യോഗിക അവതരണത്തിന് മുന്നോടിയായി ഒരു ടീസറും കമ്പനി കഴിഞ്ഞ ദിവസം പുറത്തിറക്കിയിരുന്നു. ഇതിനോടകം തന്നെ ഇന്ത്യയിൽ പരീക്ഷണയോട്ടം നടത്തിയ വാഹനത്തിന് പ്രത്യേക ആമുഖം നൽകേണ്ട ആവശ്യമില്ലെന്നതാണ് ഏറ്റവും വലിയ പ്രത്യേകത.
ഒറ്റനോട്ടത്തിൽ ഇന്നോവയുടെ പരിഷ്കരിച്ച പതിപ്പെന്ന് തോന്നിക്കുന്നതാണ് വാഹനത്തിന്റെ ഡിസൈൻ. എന്നാൽ ഇന്നോവയിൽ നിന്നും വലിയ മാറ്റങ്ങളാണ് ഡിസൈനിലുള്ളത്. എൽഇഡി ഹെഡ്ലൈറ്റുകളും ടെയിൽ ലാമ്പുകളും കാഴ്ചയിൽ വാഹനത്തിന് കൂടുതൽ മനോഹാരിത നൽകുന്നുണ്ട്. കാർണിവലിനുള്ളതിന് സമാനമായി ഇലക്ട്രിക് സ്ലൈഡിംഗ് ഡോറാണ് വെൽഫയറിനുമുള്ളത്.
ത്രീ-സോൺ ഓട്ടോമാറ്റിക് ക്ലൈമറ്റ് കൺട്രോളും, സ്മാർട്ട്ഫോൺ കണക്റ്റിവിറ്റിയുമായി സംയോജിപ്പിച്ചിരിക്കുന്ന 7.0 ഇഞ്ച് ടച്ച് സ്ക്രീൻ ഇൻഫോടെയിൻമെന്റ് സിസ്റ്റവും ടൊയോട്ടയുടെ പുത്തൻ എംപിവിയിൽ ഇടംപിടിച്ചിട്ടുണ്ട്. ഇതിനൊപ്പം മറ്റൊരു 10 ഇഞ്ച് ടച്ച് സ്ക്രീൻ എച്ച്ഡി ഡിസ്പ്ലേയും വാഹനത്തിൽ നൽകിയിട്ടുണ്ട്.
വാഹനത്തിനുള്ളിൽ കൂടുതൽ ആഡംബരം നൽകുന്നതിനായി പ്രീമിയം ലെതർ അപ്ഹോൾസ്റ്ററി ഉള്ള ഇലക്ട്രിക്കലി ക്രമീകരിക്കാവുന്ന വെന്റിലേറ്റഡ് സീറ്റുകളാണ് ടൊയോട്ട ഉൾപ്പെടുത്തിയിരിക്കുന്നത്. രണ്ടാമത്തെ വരിയിൽ ഇരിക്കുന്നവർക്കും പ്രീമിയം ഫീൽ നൽകാൻ കമ്പനി ശ്രദ്ധിച്ചിട്ടുണ്ട്. 2.5 ലിറ്റർ പെട്രോൾ എഞ്ചിനാണ് ഇന്ത്യൻ പതിപ്പ് ടൊയോട്ട വെൽഫയറിന് കരുത്തേകുന്നത്.
68 ലക്ഷം മുതൽ 80 ലക്ഷം രൂപ വരെ ഇന്ത്യൻ വിപണിയിൽ വില പ്രതീക്ഷിക്കുന്ന വെൽഫയർ മത്സരിക്കാനൊരുങ്ങുന്നത് മെർസിഡിസ് ബെൻസ് വി ക്ലാസുമായാണ്.