ലണ്ടന്: ഇംഗ്ലീഷ് പ്രീമിയര് ലീഗില് മാഞ്ചസ്റ്റര് യുണൈറ്റഡിനും ആഴ്സണലിനും മികച്ച ജയം. മൂന്നാം മത്സരത്തില് വൂള്വ്സും ഗംഭീര ജയം നേടി. ആദ്യ കളിയില് മാഞ്ചസ്റ്റര് യൂണൈറ്റഡ് എതിരില്ലാത്ത മൂന്ന് ഗോളുകള്ക്ക് വാട്ട്ഫോഡിനെ തോല്പ്പിച്ചപ്പോള് ആഴ്സണല് രണ്ടിനെതിരെ മൂന്ന് ഗോളുകള്ക്ക് എവര്ട്ടണിനെ പരാജയപ്പെടുത്തി. മികച്ച കളിയിലൂടെ എതിരില്ലാത്ത മൂന്ന് ഗോളുകള്ക്ക് വൂള്വ്സ് നോര്വിച്ചിനെ തകര്ത്തുവിട്ടതും ഞായറിന്റെ പ്രത്യേകതയായി.
മാഞ്ചസ്റററിനായി ആദ്യ ഗോള് ആദ്യ പകുതിയുടെ 42-ാം മിനിറ്റില് ബ്രൂണോയിലൂടെയായിരുന്നു. പെനാല്റ്റിയാണ് ഗോളായി മാറിയത്. 58-ാം മിനിറ്റില് ആന്റണി മാര്ഷ്യല് രണ്ടാം ഗോളും നേടി. 75-ാം മിനിറ്റില് മാസണ് ഗ്രീന്വുഡ് മൂന്നാം ഗോളും നേടി. കളിയുടെ എല്ലാ മേഖലയിലും മാഞ്ചസ്റ്റര് യുണൈറ്റഡിന് തന്നെയായിരുന്നു മേല്കൈ. എതിരാളിയുടെ കളത്തില് 21 ലേറെ ഷോട്ടുകള് പായിച്ച് യുണൈറ്റഡ് കളം നിറഞ്ഞു.
ആഴ്സണല് എവര്ട്ടണ് പോരാട്ടം ഏതാണ്ട് തുല്യ നിലയിലായിരുന്നു. അങ്ങോട്ടുമിങ്ങോട്ടു ഗോളടിച്ച് കയറുന്ന രീതിയിലാണ് ഇരുടീമുകളും ഏറ്റുമുട്ടിയത്. പിയറിയുടെ ഇരട്ട ഗോളുകളാണ് ആഴ്സണലിന് മേല്കൈ നല്കിയത്. കളിയുടെ ആദ്യ നിമിഷത്തില് തന്നെ ഡോമിനിക് ലെവിന് എവര്ട്ടണിനെ മുന്നിലെത്തിച്ചു. 27-ാം മിനിറ്റില് ആഴ്സണലിനായി എഡീ നെറ്റിയാ സമനില പിടിച്ചു. 33-ാം മിനിറ്റില് പിയറി തന്റെ ആദ്യ ഗോള് നേടി. രണ്ടാം പകുതിയുടെ ആദ്യ മിനിറ്റില് പിയറി രണ്ടാം ഗോളിലൂടെ ആഴ്സണലിനെ 3-1ന് വീണ്ടും മുന്നിലെത്തിച്ചു. 49-ാം മിനിറ്റില് റിച്ചാര്ലിസണ് എവര്ട്ടണിനായി രണ്ടാം ഗോളും നേടി. രണ്ടാം പകുതിയില് കൂടുതല് ആക്രമണം നടത്തിയെങ്കിലും ആഴ്സണല് പ്രതിരോധം ശക്തമാക്കിയതോടെ ഗോളടിക്കാന് എവര്ട്ടണിനായില്ല.
വൂള്വ്സ് എതിരില്ലാത്ത മൂന്നു ഗോളുകള്ക്കാണ് നോര്വിച്ചിനെ നിഷ്പ്രഭമാക്കിയത്. പന്ത് ഏറെ നേരം കൈവശം വച്ചിട്ടും ഗോളടിക്കാനാകാഞ്ഞതിന്റെ നിരാശയിലാണ് നോര്വിച്ച്. വൂള്വ്സാകട്ടെ കിട്ടിയ മൂന്നവസരങ്ങളും മുതലാക്കി. ഡീഗോ ജോട്ടാ 19, 30 മിനിറ്റുകളിലും റൗള് ജൈമിനസ് 50-ാം മിനിറ്റിലുമാണ് വൂള്വ്സിനായി ഗോളുകള് നേടിയത്.
